Дар Душанбе Форуми 3-юми занони Созмони ҳамкории Шанхай баргузор мегардад

ДУШАНБЕ, 07.06.2021. /АМИТ «Ховар»/. 10 июни соли равон дар ҳошияи раёсати Ҷумҳурии Тоҷикистон дар Созмони ҳамкории Шанхай (СҲШ) дар Муассисаи давлатии «Китобхонаи миллии Тоҷикистон» баргузории Форуми 3-юми занони СҲШ  пешбинӣ гардидааст.

Дар Форуми 3-юми занони СҲШ роҳбарон ва намояндагони вазорату идораҳои дахлдор, мақомоти иҷроияи ҳокимияти давлатии ВМКБ, вилоятҳои Суғду Хатлон, ноҳияҳои тобеи ҷумҳурӣ ва шаҳри Душанбе иштирок менамоянд.

Ёдовар мешавем, ки Форуми нахустини занони Созмони ҳамкории Шанхай таҳти унвони «Ҳамоҳангсозии қувваҳои занон барои пешбурди рушди муштарак»   аз 15 то 17 майи соли 2018 дар шаҳри Пекини Ҷумҳурии Мардумии Чин  доир  гардида буд.

Форум аз ҷониби Котиботи Созмони ҳамкории Шанхай ва Федератсияи Байналмилалии занони Ҷумҳурии Мардумии Чин роҳандозӣ гардида, дар он беш аз 200 намоянда аз давлатҳои  аъзои Созмони ҳамкории Шанхай ва кишварҳои нозир  иштирок намуда буданд.

ДАР АКС: Кушодашавии Форуми нахустини занони Созмони ҳамкории Шанхай, 15 майи соли 2018, Пекин. Акс аз сомонаи СҲШ