Аз 23 то 31 октябр Душанбе мизбони бозиҳои сабқати интихобии Ҷоми Осиё-2022 мегардад

ДУШАНБЕ, 08.07.2021 /АМИТ «Ховар»/. Конфедератсияи футболи Осиё кишварҳоеро, ки дар бозиҳои сабқати интихобии Ҷоми Осиё-2022-ро барои U23 баргузор мекунанд, тасдиқ намуд.  Сабқати яке аз гурӯҳҳо аз 23 то 31 октябр дар шаҳри Душанбе баргузор мешавад. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Бозиҳои даври интихобии Ҷоми Осиё-2022 дар минтақаи ғарбӣ дар Тоҷикистон  Баҳрайн, Урдун, Кувайт, Қатар ва Аморати Муттаҳидаи Араб баргузор мешаванд. Дар минтақаи шарқӣ гурӯҳҳоро Муғулистон, Индонезия, Сингапур, Тайланд ва Тайбэйи Чин мизбонӣ мекунанд.

Бино ба иттилои манбаъ қуръакашии марҳилаи интихобии чемпионати Осиё байни дастаҳои ҷавонони то 23-сола 9 июли соли равон дар Тошканд баргузор мешавад.

Дар мусобиқаи интихобии Ҷоми Осиё-2022 байни дастаҳои ҷавонони то 23-сола 43 даста ширкат меварзанд, ки бар асосӣ қуръакашӣ ба 11 гурӯҳ тақсим карда мешаванд. Дар минтақаи ғарб 6 гурӯҳ ва дар шарқ 5 гурӯҳ ташкил мегарданд.

Бояд гуфт, ки қисми ниҳоии Ҷоми Осиё-2022, ки аз 1 то 19 июни соли 2022  дар Ӯзбакистон баргузор мешавад, ёздаҳ ғолибони гурӯҳ ва чаҳор дастаи беҳтарин, ки ҷойҳои дуввумро гирифтанд, шомиланд.

АКС аз ФФТ