Аз оғози сол дар Суғд шумораи муассисаҳои томактабӣ 8 адад ва мактабҳо 12 адад афзудааст

ХУҶАНД, 23.07.2021. /АМИТ Ховар/. Итминон аст, ки давоми солҳои наздик дар шаҳри Хуҷанд як интернати замонавӣ мутобиқ ба стандарҳои муосир барои кӯдакони кару гунг ва шунавоиашон суст бунёд гардад. Ҳоло дар маркази Суғд барои кӯдакони ятиму бепарастор бо ибтикори соҳибкори маҳаллӣ сохтмони кӯдакистони хусусӣ барои 200 нафар идома дорад. Дар назар аст, ки пас аз мавриди истифода қарор гирифтани он  шароити таълиму тарбия ва зисти тарбиятгирандагон боз ҳам беҳтар гардида, кӯдакон ройгон ба таълим фаро гирифта шаванд. Дар маҷмӯъ, ҳоло дар ҳудуди вилоят 13 муассисаи таълимии шакли мактаб-интернат бо фарогирии 1 ҳазору 227 нафар фаъолият доранд.

Дар ин бора ва паҳлӯҳои дигари фаъолияти маорифчиёни вилоят дар шашмоҳаи аввали соли 2021 сардори Раёсати маорифи вилояти Суғд Осим Каримзода зимни нишасти матбуотӣ ба рӯзноманигорон маълумот дод.

Бино ба иттилои хабарнигори АМИТ “Ховар”, сардори Раёсат гуфт, ки ҳоло дар вилоят 280 муассисаи таҳсилоти томактабӣ бо фарогирии 44 ҳазору 916 нафар кӯдакон фаъолият дошта, шумораи муассисаи томактабӣ нисбат ба ҳамин давраи соли гузашта дар вилоят 8 адад афзудааст.

Инчунин соли таҳсили 2020-2021 дар вилоят 941 муассисаи таҳсилоти умумӣ бо фарогирии 565 ҳазору 231 нафар толибилмон фаъолият намуда, нисбат ба соли таҳсили 2019-2020 шумораи мактабҳо 12 адад ва хонандагон 7 ҳазору 906 нафар зиёд гардидааст.

Вобаста ба таъмиру навсозӣ ва бунёди муассисаҳои таълимӣ сардори Раёсати маорифи вилоят иброз дошт, ки тибқи нақшаи чорабиниҳои раёсат дар вилоят бинои 46 муассисаи таълимии садамавӣ ва 228 таъмирталаб ба қайд гирифта шуда, то имрӯз бинои 11 муассисаи таълимии садамавӣ барқарор гардидааст. Ҳоло дар 15-тои он корҳои навсозӣ идома дошта, 219 бинои муассисаи таълимӣ аз таъмир бароварда шуда, дар 6 муассиса корҳои таъмиру навсозӣ идома доранд.

Инчунин дар шаҳру ноҳияҳои вилоят ба истифода додани бинои 50 муассисаи таълимӣ барои 11754 хонанда пешбинӣ гардида, дар маҷмӯъ, то ин давра бинои 19 муассисаи таҳсилоти миёнаи умумӣ, томактабӣ ва дигар иншооти ҳаётан муҳими соҳаи маориф барои 4950 хонанда ба истифода дода шудаанд.

Ҳамзамон доир ба омодагиҳо ба фасли тирамоҳу зимистон дар муассисаҳои таҳсилоти миёна ва томактабӣ гуфта шуд, ки тибқи маълумоти пешакӣ, соли ҷорӣ талабот ба ангишт 7 ҳазору 528,7 тонна ва ба ҳезум 8177,2м3 –ро ташкил дода, то  9 июли соли равон нақшаи захираи ангишт 21% ва ҳезум 36,6% иҷро гардидааст. Итминон аст, ки то аввали моҳи сентябр муассисаҳо пурра таъмин гарданд.