COVID-19. Пешгирии он имрӯз дахолати ниҳодҳои давлатиро тақозо менамояд

ДУШАНБЕ, 26.07.2021. /АМИТ «Ховар»/. Таҳлилҳо нишон медиҳанд, ки фаъолияти шабонарӯзии кормандони соҳаи тандурустии мамлакат барои пешгирӣ аз паҳншавии сирояти COVID-19  басанда набуда, он дахолат ва фаъолияти ниҳодҳои дахлдори давлатӣ ва ҷомеавиро тақозо менамояд. Ин нуктаро имрӯз зимни нишасти матбуотӣ муовини аввали Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода  иброз дошт.

Ба зикри мавсуф, омили асосии паҳншавии босуръати бемории COVID-19 аз як тараф эҳтимоли воридшавии штамми тағйирёфтаи вирус, ки аз нигоҳи сироятёбӣ ва марговарӣ ниҳоят хатарнок аст, бошад, аз ҷониби дигар, пурра риоя нагардидани талаботи беҳдоштию зиддиэпидемикӣ дар байни аҳолӣ ва марказҳои гуногуни хизматрасонӣ, аз ҷумла воситаҳои мусофиркашонӣ ба ҳисоб меравад.

“Тибқи таҳлилҳо ба ҳисоби миёна ҳамарӯза бо натиҷаи мусбати ташхиси озмоишгоҳӣ то 25 нафар бистарӣ шуда, 17 нафар аз бемористон рухсат мешаванд.  Аз ҳисоби умумии сироятёфтагон ба шаҳри Душанбе 31 фоиз, вилояти Суғд 25 фоиз, вилояти Хатлон 26 фоиз, ноҳияҳои тобеи марказ 15 фоиз ва Вилояти Мухтори Кӯҳистони Бадахшон 4 фоиз  рост меояд.

Вобаста ба омилҳо ва сабаби сироятёбӣ ҳангоми таҳқиқоти эпидемиологии манбаъҳои сироят муайян карда шуд, ки 43,1 фоиз дар шароити хона  ва ё ҳангоми нигоҳубини бемор ба COVID-19 сироят ёфтаанд. 17,4 фоизи беморон сироятёбиро ба ҷойи кор алоқаманд намуда, 16,8 фоиз бемории худро ба иштирок дар маъракаю чорабиниҳо рабт медиҳанд.

Инчунин 22,7 фоизи сироятёфтагон нишон додаанд, ки пас аз рафтан ба бозору марказҳои савдо бемор шудаанд”,- афзуд Ғафур Муҳсинзода.