«МО НАМЕБАХШЕМ, ФАРОМӮШ НАМЕКУНЕМ!». Байден ба созмондиҳандагони таркишҳо дар Кобул таҳдиди «қасосгирӣ» намуд

ДУШАНБЕ, 27.08.2021 /АМИТ «Ховар»/. Президенти ИМА Ҷо Байден зимни брифинг дар Қасри  Сафед гуфт, ки Вашингтон шахсонеро, ки ба таркишҳои 26 август дар пойтахти Афғонистон рухдода даст доранд, муайян мекунад ва онҳоро ба ҷавобгарӣ мекашад, хабар медиҳад АМИТ «Ховар» бо истинод ба РБК. «Мо намебахшем, фаромӯш нахоҳем кард. Мо шуморо таъқиб мекунем  ва маҷбур мекунем, ки ҷуброн кунед»,-гуфт ӯ. Ба гуфтаи Байден, вай ба Пентагон дастур додааст, ки нақшаи интиқом алайҳи ҷангиёни исломиро, ки дар Кобул ҳамлаҳо анҷом додаанд, таҳия кунад.

 Тавре ки сарвари давлат зикр кард, хадамоти иктишофии Амрико чунин меҳисобад, ки таркишҳо дар Кобулро гурӯҳи террористии «Давлати исломӣ» (созмони террористӣ, ки дар Тоҷикистон мамнӯъ аст) ташкил кардааст, ки дар Афғонистон ва Покистон амал мекунад. Байден гуфт: «Гурӯҳе бо номи «ДИИШ дар Хуросон» ҳамлаеро оғоз кард, ки ҷони сарбозони амрикоиро, ки фурудгоҳро посбонӣ мекарданд , гирифт ва чанд тани дигарро сахт маҷрӯҳ кард.»

 Президент таъкид кард, ки «Давлати исломӣ» «пирӯз нахоҳад шуд».

«Мо дар вақт ва маконе, ки интихоб мекунем, дар он лаҳзаи интихобкардаамон бо зӯрӣ ва дақиқӣ вокуниш нишон хоҳем дод. <…> Мо амрикоиҳоро [дар Афғонистон] наҷот хоҳем дод. Мо муттаҳидони афғонамонро берун хоҳем бурд, <…> Амрикоро  наметавон тарсонид»,-гуфт дар хотима Байден.

Рӯзи 26 август дар наздикии фурудгоҳи Кобул ду таркиш ба амал омад. Бино ба иттилои вазорати мудофиаи Амрико, дар ин таркишҳо 13 низомии амрикоӣ кушта ва 15 тани дигар захмӣ шуданд. Тибқи иттилои Вазорати тандурустии Афғонистон, дар натиҷаи ҳамлаи террористӣ 90 нафар кушта, беш аз 150 нафар маҷрӯҳ шуданд.

Масъулияти таркишҳоро «Давлати исломӣ» (гурӯҳи террористӣ, ки дар Тоҷикистон мамнӯъ аст) бар уҳда гирифт. Сухангӯи Пентагон Ҷон Кирби гуфт, ки яке аз таркишҳо дар дарвозаҳои фурудгоҳ, дуввумӣ — дар назди меҳмонхонаи Baron, ки кормандони низомӣ ва хабарнигорон аз Британия дар он ҷо буданд, ​​ба амал омад. Толибон ин ҳодисаро маҳкум карданд. 15 август «Толибон» (гурӯҳи террористӣ, ки дар Тоҷикистон мамнӯъ аст) аз таъсиси назорат дар тамоми қаламрави Афғонистон хабар доданд. Толибон қасри президентро дар Кобул ишғол карданд ва сарвари давлат Ашраф Ғанӣ аз кишвар фирор кард. Афғонистонро  танҳо тавассути фурудгоҳи Кобул, ки таҳти назорати артиши СААШ аст, меиавон тарк кард. Онҳо тахлияи хориҷиёнро анҷом медиҳанд. Толибон ҳушдор додаанд, ки тахлия  бояд 31 август ба анҷом расад ва пас аз он фурудгоҳ таҳти назорати онҳо қарор мегирад.

                                                            АКС: AP 2021