Британияи Кабир ва Тоҷикистон роҳҳои дастгирии суботи минтақавӣ ва ҳалли вазъи башардӯстона дар Афғонистонро баррасӣ карданд

ДУШАНБЕ, 03.09.2021 /АМИТ «Ховар»/.  Тавре хабар дода будем, 2 сентябр Вазири корҳои хориҷии Ҷумҳурии Тоҷикистон Сироҷиддин Муҳриддин бо Котиби давлатӣ оид ба корҳои хориҷӣ, Иттиҳод ва Рушди Подшоҳии Муттаҳидаи Британияи Кабир ва Ирландияи Шимолӣ Доминик Рааб суҳбати телефонӣ анҷом дод.

Тавре Котиби давлатӣ оид ба корҳои хориҷӣ, Иттиҳод ва Рушди Подшоҳии Муттаҳидаи Британияи Кабир ва Ирландияи Шимолӣ Доминик Рааб дар саҳифааш дар «Твиттер» навиштааст, «мо бо шарикони минтақавӣ шабонарӯзӣ кор мекунем. Ман бо Вазири корҳои хориҷии Тоҷикистон Сироҷиддин Муҳриддин суҳбат кардам. Дар суҳбат масъалаи чӣ гуна кишварҳои мо метавонанд барои нигоҳ доштани субот дар минтақа ва ҳалли вазъи башардӯстона дар Афғонистон кумак кунанд, баррасӣ шуд».

Чанде қабл хабар дода шуд, ки Вазири давлатӣ оид ба кишварҳои Осиёи Ҷанубӣ ва Иттиҳоди Подшоҳии Муттаҳидаи Британияи Кабир ва Ирландияи Шимолӣ Лорд Аҳмад Уимбледон рӯзи ҷумъа барои баррасии вазъи Афғонистон ба Тоҷикистон меравад.

АКСҲО: аз манбаъҳои боз/скриншот аз саҳифаи «Твиттер»