Хатсайри нави сайёҳии Душанбе-Сангвор-Лахш-Тоҷикобод-Рашт-Нуробод-Душанбе ифтитоҳ мегардад

ДУШАНБЕ, 30.09.2021 /АМИТ  «Ховар»/. Кумитаи рушди сайёҳии  назди Ҳукумати Ҷумҳурии Тоҷикистон  аз 1 октябр дар доираи Солҳои рушди деҳот, сайёҳӣ ва ҳунарҳои мардумӣ дар самти  Душанбе-Сангвор-Лахш-Тоҷикобод-Рашт-Нуробод-Душанбе  хатсайри   нави сайёҳӣ ифтитоҳ менамояд, ки ҳадафаш муаррифии имконияти сайёҳии ноҳияҳои минтақаи Рашт мебошад.

Аз Кумитаи сайёҳии назди Ҳукумати ҷумҳурӣ ба АМИТ «Ховар» иттилоъ доданд, ки иштирокдорони хатсайри нави  сайёҳӣ бо ёдгориҳои таърихию фарҳангии водии Рашт, мавзеъҳои зебоманзари  ин минтақаи кӯҳистони Тоҷикистон, назири дараҳои Камароб, Ҷарф, инчунин, имконоти рушди сайёҳии кӯҳнавардӣ, экологӣ ва аграрӣ дар ин водӣ шинос мегарданд.

Дар доираи хатсайри  нави сайёҳӣ дар ноҳияи Рашт  конфронси миллии сайёҳӣ дар мавзӯи  «Сайёҳии дохилӣ- омили рушди  иқтисоди кишвар» доир мегардад, ки дар он масъалаҳои марбут ба  имконияти рушди сайёҳии кӯҳнавардӣ дар  Тоҷикистон дар мисоли водии Рашт, зарфияти ташкили хатсайрҳои нави сайёҳӣ, аз ҷумла сайёҳии аграрӣ дар водии Рашт баррасӣ мешаванд.

Акс аз манбаъҳои боз