Дар Ховалинг аз хизматҳои шоёни кормандони собиқи милитсия ёдовар шуданд

ХОВАЛИНГ, 10.11.2021. /АМИТ «Ховар»/. Дар ноҳияи Ховалинг бахшида ба Рӯзи милитсияи тоҷик бо иштироки кормандони шуъбаи Вазорати корҳои дохилии Ҷумҳурии Тоҷикистон дар ноҳия ва собиқадорони соҳа маҷлиси тантанавӣ доир шуд, иттилоъ дод мухбири минтақавии АМИТ «Ховар».

Сардори шуъбаи Вазорати корҳои дохилии Ҷумҳурии Тоҷикистон дар ноҳияи Ховалинг ва собиқадорони соҳа аз таърихи милитсияи тоҷик сухан ронда, аз хизматҳои даҳҳо кормандони соҳа, ки дар ноҳияи Ховалинг солҳои тӯлонӣ фаъолият намудаанд, ёдовар шуданд. Гуфта шуд, ки якчанд нафар кормандони шуъба дар барқарорсозии сохти конститутсионии давлати соҳибистиқлоламон ба ҳалокат расида, чандин нафари дигар маъюб шуданд.

Дар идомаи ҷаласа аз номи Вазири корҳои дохилӣ Рамазон Раҳимзода ва аз номи мақомоти иҷроияи ҳокимияти давлатии ноҳияи Ховалинг ба чанд нафар кормандони фаъол барои хизматҳои шоён ифтихорномаю туҳфаҳо тақдим гардиданд.

Дар ин рӯз ба оилаҳои кормандоне, ки ҳангоми иҷрои вазифа шаҳид гардидаанд, кумаки яквақта, аз қабили орду равған, шакару биринҷ ва картошкаю пиёз расонида шуд.

АКСҲО аз АМИТ «Ховар»