Насли ҷавон бояд дар рӯҳияи ватандӯстиву ифтихори миллӣ тарбия ёбад,-бардошт аз мулоқоти роҳбарияти МИҲД Душанбе бо донишҷӯёни Коллеҷи ҷумҳуриявии тиббӣ

ДУШАНБЕ, 24.11.2021. /АМИТ «Ховар»/. Дар низоми муосири давлатдории мо Паёми Пешвои миллат ҳуҷҷати муҳими расмии барномавӣ ва муайянкунада буда, яке аз роҳҳои ифодаи равшани рушди иҷтимоӣ-иқтисодӣ ва фарҳангиву сиёсии Ҷумҳурии Тоҷикистон дониста шуда, дарбаргирандаи барномаи мукаммали тамоми ниҳодҳо арзёбӣ мегардад. Ин нуктаро муовини Раиси шаҳри Душанбе Мавсума Муинӣ дар вохӯрӣ бо устодону донишҷӯёни Коллеҷи ҷумҳуриявии тиббии Тоҷикистон баён дошт, иттилоъ доданд аз шуъбаи иттилоотии дастгоҳи Раиси шаҳри Душанбе.

Вохӯрии мазкур дар доираи қарори Раиси шаҳри Душанбе дар бораи таҳким бахшидани робита бо аҳли ҷомеа доир ба ҳифзу тарғиби дастовардҳо ва арзишҳои 30 соли Истиқлолияти давлатӣ, ваҳдату ҳамдилӣ, сулҳу амният, баланд бардоштани ҳувияти миллию маънавӣ ва ҳамбастагӣ дар робита ба иҷрои вазифаҳое, ки дар Паёми Президенти Ҷумҳурии Тоҷикистон аз 26 январи соли 2021 «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон зикр гардидаанд, баргузор гардид.

Зикр шуд, ки Пешвои миллат муҳтарам Эмомалӣ Раҳмон борҳо дар паёмҳояшон таъкид намудаанд, ки вазифаи аввалиндараҷаи ҳар яки мо он аст, ки Истиқлолияти давлатамонро пойдор нигоҳ дошта, насли наврасу ҷавонро дар рӯҳияи ватандӯстиву ифтихори миллӣ, садоқат ба анъанаву суннатҳои таърихиву фарҳангии миллат ва эҳтиром ба арзишҳои умумибашарӣ тарбия намоем. Яъне насли имрӯз бояд бомаърифат, бофарҳанг, эҷодкор, номбардори миллату давлати соҳибистиқлоли Тоҷикистон гардад.

Чунончи, Пешвои муаззами миллат 30 октябри соли 2020 дар маросими савгандёдкунӣ таъкид намуданд, ки «мо ба ҷавонони даврони истиқлол эътимоди бузург дорем ва барои онҳо тамоми шароиту имконияти заруриро фароҳам месозем, то ҷавонони мо ҳамчун насли ояндасоз зимоми фардои давлат, Ватан ва халқи худро ба даст гиранд, сарзамини аҷдодиро соҳибӣ кунанд, онро обод созанд, яъне кори моро ба хотири пешрафту ободии Тоҷикистони маҳбубамон идома диҳанд».

Дар ҷараёни ҳамоиш омӯзгорони коллеҷ иброз доштанд, ки маҳз ҳамин таъкидҳои Пешвои миллат онҳоро муваззаф месозад, ки баҳри ҳифзу пойдории Истиқлолияти кишвар ва дар ин замина ҷиҳати тарбияи насли ояндасози кишвар дар рӯҳияи ватандӯстӣ ва ҳифзи арзишҳои миллӣ ҳисса гузоранд.

Аксҳо аз мақомоти иҷроияи ҳокимияти давлатии шаҳри Душанбе