Дар ДДОТ доир ба мавзӯи ҳизбу ҳаракатҳои террористиву экстремистии дар Тоҷикистон мамнуъ ҳамоиш доир шуд

ДУШАНБЕ, 07.12.2021 /АМИТ «Ховар»/. 6 декабр дар Донишгоҳи давлатии омӯзгории Тоҷикистон ба номи Садриддин Айнӣ дар мавзӯи «Ҳизбу ҳаракатҳои террористиву экстремистии дар қаламрави кишвар мамнуъ» ҷаласаи васеъ баргузор гардид, иттилоъ дод сухангӯи ДДОТ  Ҳабибулло Сатторов ба АМИТ «Ховар».

Дар ҷаласаи мазкур ректори донишгоҳ, профессор Нуъмонҷон Ғаффорӣ, прокурори Раёсати назорати иҷрои қонунҳо ва кор бо ҷавонону ноболиғони Прокуратураи генералии Ҷумҳурии Тоҷикистон, мушовири давлатии адлияи дараҷаи 3 Меҳроҷиддин Наботов, муовини ректор оид ба илм Акобир Мирзораҳимов, муовини ректор оид ба корҳои тарбиявӣ Ҷамила Мусоҷонзода, раиси иттифоқи касабаи кормандону омӯзгорон Ҳобилҷон Зикирзода ва дигар масъулини донишгоҳ ширкат намуданд.

Ҳамоиш бо мақсади пешгирӣ ва корҳои фаҳмондадиҳӣ оид ба хатарзо будани ҳизбу ҳаракатҳои террористиву экстремистии бо ҳалномаи Суди Олии Ҷумҳурии Тоҷикистон дар қаламрави кишвар мамнуъ доир гардид.

Ректори донишгоҳ Нуъмонҷон Ғаффорӣ иброз дошт, ки “раёсати Донишгоҳи давлатии омӯзгории Тоҷикистон ҳамарӯза миёни донишҷӯёни факултетҳо, инчунин дар хобгоҳҳои донишгоҳ барои  нагаравидани ҷавонону донишҷӯён ба ҳар гуна ҳизбу ҳаракатҳои ифротии дар қаламрави кишвар мамнуъ вохӯрию суҳбатҳо баргузор менамояд, то ба ин восита дар дили ҷавонон меҳру муҳаббат нисбат ба Ватан, модар ва дигар муқаддасот бедор намояд”.

Прокурори Раёсати назорати иҷрои қонунҳо ва кор бо ҷавонону ноболиғони Прокуратураи генералии Ҷумҳурии Тоҷикистон, мушовири давлатии адлияи дараҷаи 3 Меҳроҷиддин Наботов дар мавзӯи “Масоили ҳизбу ҳаракатҳои террористиву экстремистии бо ҳалномаи Суди Олии Ҷумҳурии Тоҷикистон дар қаламрави кишвар мамнуъшуда, аз ҷумла, ҳаракати радикалии “Толибон” сухан гуфта, иброз дошт, ки “ҳадафҳои асосие, ки Ҳукумати Ҷумҳурии Тоҷикистон дар самти масъалаҳои зикршуда ҷонибдор аст, мебояд миёни донишҷӯён таблиғу ташвиқ карда шуда, моҳияти таълимоти ифротиву экстремистии ҳизбу ҳаракатҳои дар қаламрави кишвар мамнуъ ба самъи онҳо расонида шавад, то ҷавонони ноогаҳ ба доми ин гуна ашхоси дорои ҳаракатҳои номатлуб гирифтор нашаванд”.

Дар ҷаласа мавзӯъҳо оид ба фаъолияти ҳизбу ҳаракатҳои дар қаламрави Ҷумҳурии Тоҷикистон мамнӯи террористӣ, аз ҷумла ҳаракати “Толибон”, ҳаракату ҷараёнҳои тундраву иртиҷоӣ мавриди баррасӣ қарор гирифта, масъулин ҷиҳати тавсеаи корҳои фаҳмондадиҳӣ бобати масъалаҳои мазкур вазифадор карда шуданд.

АКСҲО: ДДОТ ба номи С. Айнӣ