Вазорати рушди иқтисод ва савдо ба ниёзмандони ноҳияи Панҷ туҳфаҳои солинавӣ тақдим намуд

ДУШАНБЕ, 31.12.2021. /АМИТ «Ховар»/. Аз ҷониби роҳбарияти Вазорати рушди иқтисод ва савдо дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ятимони кулл ва бепарастон, инчунин аскарони қисми низомии ноҳияи Панҷ кумакҳои моддӣ ва туҳфаҳои солинавӣ дастрас гардиданд, хабар доданд аз Вазорати мазкур ба АМИТ «Ховар».

Бахшида ба Соли нави мелодӣ ба ятимони кулл ва бепарасторон, инчунин аскарони қисми низомии ноҳияи Панҷ 200 кг орд, 200 кг биринҷ, 200 кг шакар, 60 кг макарон, 100 литр равған ва 120 адад туҳфаҳои солинавӣ супорида шуданд.

Роҳбарияти вазорат кӯдакони ятими кулл, бепарасторони ноҳияи Панҷ ва афсарону аскарони қисми ҳарбии ноҳияро бо фарорасии соли нави 2022 аз номи Ҳукумати кишвар ва Вазорати рушди иқтисод ва савдо самимона шодбош гуфта, ба онҳо бахту пирӯзӣ, зиндагонии босаодат ва толеи баланд орзу намуданд.

Зикр гардид, ки ғамхорӣ зоҳир намудан ба ятимону бепарасторон, пирону эҳтиёҷмандон, маъюбону камбизоатон дар мадди назари доимии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати ҷумҳурӣ қарор дорад.

АКС аз Вазорати рушди иқтисод ва савдои ҶТ