ДАР ТОҶИКИСТОН БОЗ ҲОЛАТҲОИ ГИРИФТОРШАВӢ БА COVID-19 БА ҚАЙД ГИРИФТА ШУДАНД. Табиби бемориҳои сироятӣ ба АМИТ «Ховар» дар бораи нишонаҳои омикрон нақл кард

ДУШАНБЕ, 22.01.2022 /АМИТ «Ховар»/. Тавре АМИТ «Ховар» қаблан хабар дода буд, пас аз танаффуси думоҳа дар Тоҷикистон ҳолатҳои гирифторӣ ба коронавирус дубора ба қайд гирифта шуданд. Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дирӯз дар бораи 23 ҳолати нави сироятёбии шаҳрвандони кишвар ба ин беморӣ хабар дод.

Ҳанӯз  гуфта нашудааст, ки гап сари кадом навъи коронавирус меравад, ҳарчанд аллакай гузоришҳои зиёде дар бораи вуруди навъи «омикрон» ба кишварҳои ИДМ, аз ҷумла ба Осиёи Марказӣ нашр гардида буданд.

Ба ҳар сурат, хабарнигори АМИТ «Ховар» аз профессори кафедраи микробиология, иммунология ва вирусологияи Донишгоҳи давлатии тиббии Тоҷикистон ба номи Абӯалӣ ибни Сино Саидбек Сатторов хоҳиш намуд, ки дар бораи нишонаҳои (оризаҳои)  асосии навъи нави бештар ва тезтар сирояткунанда – «омикрон» нақл кунад.

«Дарди сару бадан, бемадорӣ, дарди гулӯ, сулфа ва атса, дарди шикам аз нишонаҳои асосии  омикрон маҳсуб ёфта, он  бештар ба зукоми маъмулӣ монандӣ дорад», — гуфт ӯ.

Ба андешаи мавсуф, навъи «омикрон» шакли нави тағйирёфтаи COVID-19 буда, нишонаҳои он ба дигар навъҳои COVID-19 қариб ки монандӣ доранд.

«Баморӣ  метавонад дар шакли обравӣ аз бинӣ, бемадорӣ, дарди сар, беиштиҳоӣ ва халалдоршавии хоб ба амал ояд, вале он  нисбат ба дигар намудҳои COVID-19  сабуктар  мегузарад», — гуфт Саидбек Сатторов.

«Навъи омикрон хеле зудпаҳншаванда  буда, давраи беморӣ нисбатан сабук паси сар мешавад. Дар баъзе ҳолатҳо метавонанд нишонаҳои  беморӣ дар 3-4 рӯз бартараф шаванд. Навъи нави COVID-19-ро аз шамолхӯрдагӣ фарқ кардан мушкил аст. Аз ин рӯ, дар сурати ҷой доштани нишонаҳои зикршуда бемор метавонад аз ташхиси COVID-19 гузарад»,- афзуд ӯ.

Ёдовар мешавем, ки навъи омикронии коронавирус ё B.1.1.529 моҳи ноябри соли 2021 дар Ботсвана ва Африқои Ҷанубӣ ба қайд гирифта шуда буд. Ба гуфтаи коршиносон, афроде, ки бемор гардидаанд ва ваксина гирифтаанд, низ метавонанд ба он гирифтор шаванд. Навъи нав аллакай дар 110 кишвари ҷаҳон, аз ҷумла дар кишварҳои ИДМ ошкор шудааст. Ба ақидаи коршиносон, омикрон нисбат ба навъи қаблӣ – «делта» зудтар паҳн мешавад.

                                                                    Холисаи АСОМИДДИН,
АМИТ «Ховар»

АКС аз бойгонии АМИТ «Ховар»