ҶОМИ КФО-2022. Ҳарифони дастаҳои «Хуҷанд» ва КМВА муайян гардиданд

ДУШАНБЕ, 18.01.2022 /АМИТ «Ховар»/. Дар қароргоҳи Конфедератсияи футболи Осиё (КФО) дар Куала Лумпур имрӯз маросими қуръакашии марҳилаи гурӯҳии Ҷоми КФО-2022 доир гашт, ки ҳарифони клубҳои Тоҷикистон – “Хуҷанд” ва КМВА муайян шуданд. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Мисли мавсими гузашта имсол низ дар минтақаи Марказӣ ду гурӯҳ таъсис дода шуд – якеаш иборат аз 4 даста, дигараш- аз 3 даста.

Барандаи медали нуқраи Чемпионати Тоҷикистон – дастаи “Хуҷанд” дар гурӯҳи “F” баромад мекунад. Ҳарифонаш клубҳои “Дордой” (Қирғизистон) ва “Копетдаг” (Туркманистон) ҳастанд.

Дастаи нави Ҷоми КФО – КМВА-и Душанбе дар гурӯҳи “Е” бозӣ мекунад. Барандаи медалҳои биринҷии чемпионати мамлакатро бозиҳо муқобили клубҳои “Насаф” ё “Согдиана” (Узбекистон), “Олтин Асир” (Туркманистон) ва “Нефтчӣ” (Қирғизистон) интизор аст.

Дастаҳои беҳтарини гурӯҳҳо дар финали минтақавии Ҷоми КФО-2022 вомехӯранд. Ғолиби ин дидор ба даври дигар роҳхат гирифта, 100 000 доллари ИМА ҷоизапулӣ дарёфт мекунад.

Зикр кардан ба маврид аст, ки дар сурати ба Лигаи чемпионҳои КФО роҳхат гирифтани дастаи “Насаф”-и Қаршӣ, дар Ҷоми КФО-2022 барандаи медалҳои нуқраи чемпионати Узбекистон- “Согдиана”-и Ҷиззах ширкат мекунад. Агар “Насаф” натавонад ба марҳилаи гурӯҳии Лигаи чемпионҳои КФО роҳ ёбад, пас иштирокшаро дар Ҷоми КФО идома медиҳад.

Ҷоми Конфедератсияи футболи Осиё-2022

Минтақаи Марказӣ

Гурӯҳи «Е»: «Насаф» ё «Согдиана» (Узбекистон), «Олтин Асир» (Туркманистон), КМВА (ТОҶИКИСТОН), «Нефтчӣ» (Қирғизистон).

Гурӯҳи «F»: «ХУҶАНД» (ТОҶИКИСТОН), «Дордой» (Қирғизистон), «Копетдаг» (Туркманистон).

АКСҲО: ФФТ