Дар Душанбе Фестивали II дӯстии афсарону сарбозон ва ҷавонони синни даъватӣ ифтитоҳ ёфт

Февраль 18, 2022 15:46

ДУШАНБЕ, 18.02.2022. /АМИТ «Ховар»/. Дар саҳни Маркази таълимии «Пойтахт», қисми ҳарбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар шаҳри Душанбе Фестивали II дӯстии афсарону сарбозон ва ҷавонони синни даъватӣ таҳти унвони «Барои давлату миллатам содиқона хизмат мекунам» ифтитоҳ гардид. Дар он тамоми дастовардҳои ҳарбию низомии ҷузъу томҳои Қувваҳои Мусаллаҳ, ки дар ҳудуди шаҳри Душанбе адои фаъолият менамоянд, ба намоиш гузошта шуд, иттилоъ доданд дар шуъбаи иттилоотии дастгоҳи Раиси шаҳри Душанбе.

Дар фестивал муовини Раиси шаҳри Душанбе Умед Гуреззода, муовини Вазири мудофиаи Ҷумҳурии Тоҷикистон Абдусаттор Шоҳиён, роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раёсати кор бо ҷавонон ва варзиши шаҳри Душанбе, роҳбарияти воҳидҳои сохтории мақомоти иҷроияи ҳокимияти давлатии шаҳри Душанбе, ҷузъу томҳои Қувваҳои Мусаллаҳ, беш аз 1200 нафар афсарону сарбозон ва ҷавонони синни даъватию тодаъватӣ ҳузур доштанд.

Фестивал аз чор қисмати асосӣ иборат буда, қисмати аввали онро маросими ифтитоҳӣ, қисмати дуюму сеюми онро бахшҳои варзишӣ аз рӯйи намудҳои варзишии футболи хурд, волейбол, шоҳмот, гӯштини миллӣ ва варзиши сабук дар ду марҳила, марҳилаи интихобии 1-ум дар заминаи қисмҳои ҳарбию низомӣ ва марҳилаи интихобии 2-юм дар сатҳи шаҳр, инчунин даври чоруми фестивалро маросими ҷамъбастӣ ва ҷоизасупории дастаҳои ғолиб бо барномаи рангини фарҳангӣ ташкил намуд.


Инчунин дар доираи фестивал бо иштироки роҳбарият, афсарону сарбозон ва ҷавонони синни даъватӣ ва тодаъватӣ дар «Кохи афсарон»-и Вазорати мудофиаи Ҷумҳурии Тоҷикистон Конференсияи илмӣ – амалӣ ва назариявӣ зери унвони «Дастовардҳои ҳарбию низомии даврони истиқлолият: ҳолат ва дурнамо», «Пос доштани обу хоки Ватан — рисолати ҷавонмардист» бо пешниҳоди роликҳои тарғиботӣ бо ҷалби 100 нафар, ташкили мулоқоту суҳбатҳо бо афсарону сарбозон ва курсантон дар Донишкадаи олии ҳарбӣ, Академияи Вазорати корҳои дохилӣ ва дигар ҷузъу томҳои қувваҳои мусаллаҳ (дар сатҳи Раёсат ва комендатура) бо ҷалби қариб 1000 нафар, ташкили мизи мудаввар дар мавзӯи «Хизмат ба Ватан — шарафи ҷавонмардист!» бо фарогирии 70 нафар ва ташкили аксияҳои иттилоотию тарғиботӣ дар мавзӯи «Ба муҳофизати Ватани маҳбубамон омода бош!» бо тақсими беш аз 5000 адад варақаҳои иттилоотӣ ва 500 адад китобҳои ватандӯстона доир карда мешаванд.


Дар назар аст, ки дар марҳилаи 2-юми ҷамъбасти фестивал, ки 22 феврал дар толори «Кохи Суруш»-и шаҳри Душанбе баргузор мегардад, ғолибон аз ҷониби Мақомоти иҷроияи ҳокимияти давлатии шаҳри Душанбе бо Диплом, медал, ҷом ва туҳфаҳои хотиравӣ сарфароз гардонида шаванд.

Ёдовар мешавем, ки фестивали мазкур бо қарори Раиси шаҳри Душанбе муҳтарам Рустами Эмомалӣ аз 17 то 22 феврал дар ҳудуди пойтахт баргузор мегардад.

 

АКСҲО: шуъбаи иттилоотии дастгоҳи Раиси шаҳри Душанбе

Февраль 18, 2022 15:46

Хабарҳои дигари ин бахш

Дар шаҳраку маҳаллаҳои ноҳияҳои Душанбе озмунҳои «Беҳтарин ҳамсар» ва «Фарзанд – боғи падару модар» гузаронида шуданд
Дар асоси қарори Раиси шаҳри Душанбе дар пойтахт намоишгоҳи фурӯши либосҳои мактабӣ ва лавозимоти дарсӣ оғоз гардид
Доир ба муқовимат ба коррупсия чун кафили рушди соҳаи маориф конференсия баргузор гардид
Бахшида ба Рӯзи варзишгарони Тоҷикистон дар Душанбе Марафони велосипедронӣ баргузор мегардад
Дар шаҳри Душанбе 34-солагии Истиқлолияти давлатӣ ботантана ҷашн гирифта мешавад
Соли 2025 ба шаҳри Душанбе беш аз 450 ҳазор сайёҳ ворид гардид
Ба шаҳри Душанбе зиёда аз 11 ҳазор электромобил ворид карда шудааст
Соли 2025 дар шаҳри Душанбе 16 муассисаи таълимӣ ба истифода дода мешавад
НИШАСТИ МАТБУОТӢ. Дар ҳудуди шаҳри Душанбе сохтмони 7 эстакадаи нав оғоз меёбад
НИШАСТИ МАТБУОТӢ. Дар ноҳияи Сино сохтмон ва навсозии 279 иншоот ба нақша гирифта шудааст
НИШАСТИ МАТБУОТӢ. Корхонаҳои саноатии ноҳияи Фирдавсӣ ба маблағи зиёда аз 882 миллион сомонӣ маҳсулот истеҳсол намуданд
НИШАСТИ МАТБУОТӢ. Варзишгарони ноҳияи Исмоили Сомонии пойтахт дар мусобиқаҳо соҳиби 1620 медал шуданд