Сарвазири Тоҷикистон Қоҳир Расулзода бо Директори генералии Ширкати нассоҷии «Балтика Групп»-и Русия Михаил Бочаров мулоқот намуд

ДУШАНБЕ, 25.02.2022 /АМИТ «Ховар»/. Имрӯз Сарвазири Ҷумҳурии Тоҷикистон Қоҳир Расулзода бо Директори генералии Ширкати нассоҷии «Балтика Групп»-и Федератсияи Русия Михаил Бочаров мулоқот намуд, хабар медиҳад АМИТ «Ховар».

Таъсиси коргоҳу корхонаҳои истеҳсолии муштарак, сармоягузорӣ, коркарди ниҳоии маҳсулот ва дар маҷмуъ, тақвият бахшидани ҳамкорӣ аз масъалаҳои муҳими мулоқот дониста шуд.

Таъкид гардид, ки Тоҷикистон имкони хуби сармоягузорӣ дорад ва барои рушди бахши хусусӣ ва таъсиси коргоҳу корхонаҳои гуногуни истеҳсолӣ дар заминаи Стратегияи миллии рушди Ҷумҳурии Тоҷикистон барои давраи то соли 2030, саноатикунонии босуръати кишвар ҳамчун ҳадафи чоруми миллӣ ва таъсиси минтақаҳои озоди иқтисодӣ дар соҳаи саноату сармоягузоррӣ имкони созгор фароҳам сохта, татбиқи якчанд имтиёзро ба роҳ мондааст.

Ҷумҳурии Тоҷикистон имкони хуби истеҳсоли маҳсулоти соҳаи кишорвазиро доро буда, ба василаи то сатҳи ниҳоӣ коркард намудан ба таъсиси ҷойҳои нави корӣ, истеҳсоли маҳсулоти ивазкунандаи воридот, баланд гардидани сатҳи некуаҳволӣ ва дар маҷмуъ, ба рушди иқтисоди миллӣ замина мегузорад.

АКСҲО: АМИТ «Ховар»