Шавкат Бобозода ва Ян Бори имконоти содироти маҳсулоти хушсифати Тоҷикистонро баррасӣ намуданд

ДУШАНБЕ, 30.03.2022 /АМИТ «Ховар»/. Масъалаҳои дарёфти бозорҳои содиротӣ, баланд бардоштани иқтидори содиротӣ ва мусоидат ҷиҳати содироти маҳсулоти ватанӣ, аз ҷумла меваю сабзавоти хушк ва маҳсулоти нассоҷӣ 29 март зимни вохӯрии директори Агентии содироти назди Ҳукумати Ҷумҳурии Тоҷикистон Шавкат Бобозода ва Сафири Фавқулода ва Мухтори Ҷумҳурии Словакия дар Тоҷикистон Ян Бори мавриди муҳокима қарор гирифтанд.  

Тавре дар Агентии содирот ба АМИТ «Ховар» хабар доданд, дар ҷараёни вохӯрӣ директори Агентӣ Шавкат Бобозода иброз дошт, ки яке аз нишондиҳандаҳои асосии маҳсулоти кишоварзӣ- ин содироти меваҳои хушсифату тару тоза, мева ва сабзавоти хушк мебошад, ки солҳои охир дар бозори ҷаҳонӣ харидори зиёд пайдо намуда, аз ҷиҳати экологӣ тоза ва болаззату шаҳдбор буда, дар хориҷи мамлакат бозорҳои содиротии худро пайдо намудаанд.

Зикр шуд, ки «Барномаи давлатии рушди содироти Ҷумҳурии Тоҷикистон барои солҳои 2021-2025» қабул шудааст, ки ҳадафи он рушди содироти молу хизматрасонӣ, таҳкими истеҳсолоти ба содирот нигаронидашуда ва ивазкунандаи воридот, кам кардани ҳиссаи молҳои истеъмолӣ ва хизматрасонӣ дар ҳаҷми умумии воридот, фароҳам овардани шароити мусоид барои татбиқи сиёсати хориҷии иқтисодии давлатӣ, инчунин баланд бардоштани рақобатпазирии маҳсулоти ватанӣ дар бозорҳои дохилӣ ва хориҷӣ мебошад.

Дар вохӯрӣ имконияти содироти маҳсулоти ватанӣ, инчунин самтҳои асосии фаъолияти Агентии содирот, аз ҷумла мусоидат ба рушди босуботи миқдор ва сифати содироти молу маҳсулоти ватанӣ ба хориҷи мамлакат, баланд бардоштани иқтидори содиротии кишвар ва ҷалби харидорони хориҷӣ муаррифӣ шуданд.

АКС: Агентии содироти назди Ҳукумати ҶТ