Сироҷиддин Муҳриддин ва Насрин ал-Ҳошимӣ омодагиро ба Конфронси дуюми байналмилалӣ оид ба об дар Душанбе баррасӣ намуданд

ДУШАНБЕ, 20.03.2022 /АМИТ «Ховар»/. Мулоқоти Вазири корҳои хориҷии Ҷумҳурии Тоҷикистон  Сироҷиддин Муҳриддин бо Роҳбари Академияи султонии илм ва эътимоди байналмилалӣ (RASIT) Насрин ал-Ҳошимӣ 18 март дар шакли видеоконференсия баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар вохӯрӣ Сироҷиддин  Муҳриддин роҷеъ ба омодагӣ ба Конфронси дуюми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” таҳти унвони “Такон бахшидан ба амалҳо ва шарикӣ дар соҳаи об дар сатҳҳои маҳаллӣ, миллӣ, минтақавӣ ва ҷаҳонӣ” (Душанбе, 6-9 июни 2022) маълумот ироа карда, аҳаммияти онро ҳамчун чорабинии ҷаҳонии тадорукотӣ ба Конфронси Созмони Милали Муттаҳид оид ба бознигарии фарогири миёнамуҳлати ҳадафҳои Даҳсолаи Об (Ню-Йорк, 22-24 марти 2023) таъкид намуд.

Дар навбати худ, Насрин ал-Ҳошимӣ дар хусуси ташаббусҳои Академияи мазкур дар соҳаи об, аз ҷумла барномаи байналмилалӣ зери унвони “Cansu Global”, ки ҳадаф аз он рушди босуръат ва корбурди илм, фанноварӣ ва навоварӣ дар ҳалли масъалаҳои марбут ба об маҳсуб меёбад, ибрози назар кард.

Ҳамчунин ҷонибҳо дар бобати масъалаҳои мавриди эҳтимоми муштарак табодули афкор карда, омодагии хешро ҷиҳати ҳамкориҳои дуҷониба ва бисёрҷониба дар соҳаи мудирияти захираҳои об изҳор намуданд.

АКСҲО: ВКХ Тоҷикистон