Дарвозабон Рустам Ятимов беҳтарин бозингари вохӯрии дастаҳои «Истиқлол» ва «Шарҷа» дониста шуд

ДУШАНБЕ, 29.04.2022 /АМИТ «Ховар»/. Дарвозабони дастаи футболи «Истиқлол»-и шаҳри Душанбе Рустам Ятимов беҳтарин бозингари вохӯрӣ миёни дастаҳои футболи «Истиқлол»-и шаҳри Душанбе ва «Шарҷа»-и Амороти Муттаҳидаи Араб дониста шуд, хабар медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Вохӯрии дастаҳо дар варзишгоҳи байналмилалӣ ба номи Шоҳ Фаҳди шаҳри Риёз доир шуда, бо натиҷаи 2 бар 0 ба нафъи дастаи футболи «Истиқлол»-и шаҳри Душанбе анҷом ёфт. Голҳоро дар ҳайати дастаи «Истиқлол»-и шаҳри Душанбе Эрик Бокум дар дақиқаи 14-ум ва Владислав Касминин дар дақиқаи 90+1 ба нишон расониданд.

Ёдовар мешавем, ба даври 1/8-ниҳоӣ аз гурӯҳи «А» дастаҳои футболи «Ал-Ҳилол»-и Арабистони Саудӣ ва «Ал-Райян»-и Қатар бо касби 13 имтиёзӣ роҳхат гирифтанд. Дастаи футболи «Истиқлол»-и шаҳри Душанбе-чемпиони Тоҷикистон дар гурӯҳ бо касби 3 имтиёз дар зинаи охирин мавқеъ гирифта, аз идомаи мусобиқа бенасиб монд.

АКС: ФФТ