Лигаи қаҳрамонҳои КФО: Дастаи футболи «Истиқлол» ба Риёз расид

ДУШАНБЕ, 04.04.2022 /АМИТ «Ховар»/. Дастаи футболи «Истиқлол»-и Душанбе барои ширкат дар сабқати гурӯҳии Лигаи қаҳрамонҳои КФО-2022, ки дар шакли мутамарказ баргузор мешавад, 3 апрел вориди Арабистони Саудӣ шуд. Дар ин бора АМИТ «Ховар» бо истинод ба саҳифаи Фейсбукии дастаи футболи «Истиқлол» хабар медиҳад.

Дастаи «Истиқлол» — ро дар фурудгоҳи Риёз намояндагони кумитаи тадорукоти Лигаи қаҳрамонҳо ва кормандони Сафорати Тоҷикистон дар Арабистони Саудӣ гарм истиқбол гирифтанд.

Ёдовар мешавем, ки дар натиҷаи қуръакашӣ дастаи «Истиқлол»-и Душанбе ба гурӯҳи «А» шомил шуд. Ҳарифони чемпиони Тоҷикистон дар марҳилаи гурӯҳӣ “Ал-Ҳилол” (Арабистони Саудӣ) ва “Ал-Райян” (Қатар), инчунин ғолиби бозии плей-офф миёни дастаҳои “Шарҷа” (АМА) ва “Ал-Завраа” (Ироқ) мебошанд.

Бозиҳои марҳилаи гурӯҳии мусобиқаи асосии Осиё миёни клубҳо дар минтақаи Ғарб дар қолаби марказонидашуда аз 8 то 27 апрел доир мегарданд. Дар асоси низомнома, ғолибони 10 гурӯҳ аз ду минтақа, ҳамчунин 6 даста, ки бо нишондиҳандаи беҳтар ҷои дуюмро дар гурӯҳашон сазовор мешаванд, ба 1/8-финал роҳхат мегиранд. Дар сурати ба даври дигар баромадан “Истиқлол” бозии даври 1/8-финалро 3 ё 4 феврали соли 2023 доир менамояд.

АКСҲО: Дастаи футболи «Истиқлол»