ЛИГАИ ЧЕМПИОНҲОИ КФО. «Истиқлол» дар даври дуюм бо дастаи «Шарҷа»-и Амороти Муттаҳидаи Араб бозӣ мекунад

ДУШАНБЕ, 11.04.2022 /АМИТ «Ховар»/. Пагоҳ чемпиони Тоҷикистон – дастаи футболи «Истиқлол»-и шаҳри Душанбе дар  бозии даври дуюми марҳилаи гурӯҳии Лигаи чемпионҳои КФО-2022 бо дастаи «Шарҷа»-и Амороти Муттаҳидаи Араб вориди рақобат мешавад. Дар ин бора шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Чанд рӯз пеш дастаи футболи «Истиқлол»-и шаҳри Душанбе дар бозии нахустинаш дар марҳилаи гурӯҳии Лигаи чемпионҳои Конфедератсияи футболи Осиё (КФО)-2022 дар гурӯҳи «А» аз дастаи «Ал-Райян»-и Қатар бо ҳисоби 2:3 мағлуб шуд. Бозии дастаҳо шоми 8 апрел дар Варзишгоҳи байналмилалии «Шоҳ Фаҳд»-и шаҳри Риёзи Арабистони Саудӣ баргузор шуда буд.

Голҳоро дар ҳайати дастаи «Истиқлол» Шаҳром Сулаймонов ва легионери узбекистонӣ Муҳаммад Исоев заданд.

Дар бозии дигари гурӯҳи «А» дастаи «Ал-Ҳилол»-и Арабистони Саудӣ  бар дастаи футболи   «Шарҷа»-и  Амороти Муттаҳидаи Араб бо ҳисоби 2:1 пирӯз шуд.

АКС: ФФТ