Сарвари давлат Эмомалӣ Раҳмон дар шаҳри Хуҷанд аз бинои Театри давлатии мусиқӣ-мазҳакавии ба номи Камоли Хуҷандӣ боздид намуданд

Апрель 15, 2022 13:06

ДУШАНБЕ, 15.04.2022 /АМИТ «Ховар»/. Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Хуҷанд аз бинои Театри давлатии мусиқӣ-мазҳакавии ба номи Камоли Хуҷандӣ, ки аз таъмиру таҷдид бароварда шуд, боздид намуданд.

Дар бинои фарҳангӣ барои фаъолияти аҳли эҷод ва тамошои намоишҳо шароити зарурӣ муҳайё карда шудааст.

Театри вилоятӣ аз 3 ошёна ва таҳхона иборат буда, дар таҳхонаи бинои театр толорҳои машқу тамрини ҳунармандон, утоқҳо барои гузаронидани дарс пешбинӣ гардидааст, ки барои фаъолияти назарраси ҳунармандон заминаи воқеӣ мегузорад.
Дар ошёнаи якуми бино миёнсарой, толори асосӣ барои саҳна, хонаҳои маданият бо ҷойҳои либосивазкунӣ, ҳуҷраҳои маъмурияти театр ва ҳуҷраҳои санитарӣ ҷойгир карда шудаанд. Толори асосии театр дорои 612 ҷойи нишаст мебошад.

Саҳнаи театри мазкур бо нақшу нигори миллии мардуми соҳибтамаддуни тоҷик гаҷкорӣ шудааст. Бори аввал саҳна бо дастгоҳҳои замонавии равшанидиҳию тақвияти овоз таъмин гардида, барои гузаронидани чорабиниҳои сиёсию фарҳангӣ мусоид мебошад.

Дар ошёнаҳои 2-юм ва 3-юми бино ҳуҷраҳои корӣ, фароғати ҳунармандон, устохонаҳои дӯзандагӣ, сехи рассомӣ ва хуҷраи ороишӣ ҷойгир шудаанд.

Ҳамчунин дар доираи корҳои ободониву созандагӣ дар ошёнаи сеюми бинои Театри давлатии мусиқӣ-мазҳакавии ба номи Камоли Хуҷандӣ саҳнаи хурд бо 102 ҷойи нишаст ба истифода дода шудааст.

Дар заминаи сиёсати фарҳангпарваронаи Пешвои миллат муҳтарам Эмомалӣ Раҳмон дар солҳои соҳибистиқлолӣ мақому манзалати театри тоҷик баланд гардида, шароити муносиби корӣ барои кормандони соҳа фароҳам оварда мешавад. Зеро театр як шохаи асосии фарҳанг ба ҳисоб рафта, таҷассумгари ҳувияти миллӣ, инъикоскунандаи ҳаёти иҷтимоӣ аст ва асолати миллиро тариқи намоишномаҳо пойдору устувор нигоҳ медоранд.

Ҳудуди бинои Театри давлатии мусиқӣ-мазҳакавии ба номи Камоли Хуҷандӣ бо тахтасангҳои мармарини истеҳсоли коргоҳҳои вилоят ороиш ёфтааст.

Роҳравҳои бино бо маҳсулоти ватанӣ зинат дода шуда, бо усули ҳозиразамони сохтмонӣ ҷолибу диданӣ офарида шудааст.

Атрофи театр пурра гулкорӣ ва бо сутунпояҳои равшанидиҳанда чароғон шуда, 5 адад суҳбаткада сохта шудааст.

Пешвои миллат муҳтарам Эмомалӣ Раҳмон зимни шиносоӣ ба санъати баланди меъмории миллии бинои театр, ки аз ҷониби устоҳои чирадасти вилоят бо усули нотакрор зебу зинат ёфтааст, баҳои баланд доданд.

Таъмир ва бо намуди наву замонавӣ мавриди баҳрабардорӣ қарор додани иншооти мазкур дар шаҳри Хуҷанд ба баланд бардоштани сатҳу сифати фаъолияти аҳли фарҳангу санъати вилояти Суғд равона гардида, ба тарҳи меъмории шаҳр низ зебоии тоза зам намуд.

Имрӯз дар Театри давлатии мусиқӣ-мазҳакавии ба номи Камоли Хуҷандӣ 161 нафар фаъолият дошта, 70 нафари онҳоро гурӯҳи эҷодӣ ташкил медиҳад.

Бо истифода аз толорҳои барҳаво ва ҳуҷраҳо барои машқу тамрин ҳунармандони касбии театри вилоятӣ имконият доранд, ки минбаъд барномаҳои гуногун ва намоишномаҳои ҷаззобу диданиро пешниҳоди тамошобинони закӣ гардонанд.

Пас аз боздид ва шиносоӣ бо шароиту имконияти театр, Президенти Ҷумҳурии Тоҷикистон муҳтарам Эмомалӣ Раҳмон дар толори бузурги он бо аҳли фарҳанг мулоқоти самимӣ доир намуданд.

Пас аз суханронии Сарвари давлат аҳли санъати вилоят барномаи хуби фарҳангии тараннумкунандаи сулҳу ваҳдати ҷовидонаи тоҷикон ва дастовардҳои замони соҳибистиқлолии давлатро пешкаш карданд, ки бисёр ҷолибу диданӣ буд.

Ҳунармандони касбӣ бо офаридани намоишномаҳои театрӣ дар рушди соҳа, баланд бардоштани ғановати маънавӣ ва тарғиби сиёсати фарҳангпарваронаи Пешвои муаззами миллат саҳми шоиста мегузоранд.

Айни ҳол дар вилояти Суғд 7 театри касбӣ дар шаҳру ноҳияҳои Хуҷанду Бӯстон, Конибодом, Спитамен, Ашт ва дар 5 шаҳру ноҳияҳои дигар Исфара, Деваштич, Мастчоҳ, Панҷакент ва Истаравшан театрҳои халқӣ фаъолият доранд.

Пешвои миллат муҳтарам Эмомалӣ Раҳмон ба ҳунари волои санъаткорону ҳунармандони вилоят баҳои баланд доданд.

Аҳли фарҳанги вилояти Суғд, хосса ҳунармандони театр ба Президенти Ҷумҳурии Тоҷикистон муҳтарам Эмомалӣ Раҳмон барои чунин таваҷҷуҳ, ки василаи хуби ҳифзи фарҳанги бузурги халқи тоҷик аст, изҳори сипосу миннатдорӣ карданд.

Боздид аз бинои Театри давлатии мусиқӣ-мазҳакавии ба номи Камоли Хуҷандӣ дар шаҳри Хуҷанд 15.04.2022

Апрель 15, 2022 13:06

Хабарҳои дигари ин бахш

Сафари давлатии Президенти Ҷумҳурии Тоҷикистон Эмомалӣ Раҳмон дар Ҷумҳурии Қирғизистон ба анҷом расид
Президенти Ҷумҳурии Тоҷикистон Эмомалӣ Раҳмон бо Раиси Девони вазирони Ҷумҳурии Қирғизистон Адилбек Касималиев мулоқот намуданд
Президенти Ҷумҳурии Тоҷикистон Эмомалӣ Раҳмон бо Торагаи Жогорку Кенеши Ҷумҳурии Қирғизистон Нурланбек Шакиев мулоқот намуданд
Изҳороти муштарак оид ба таҳкими минбаъдаи риштаҳои дӯстӣ ва некуҳамсоягӣ байни Ҷумҳурии Тоҷикистон ва Ҷумҳурии Қирғизистон
Изҳороти матбуотии Президенти Ҷумҳурии Тоҷикистон аз рӯйи натиҷаҳои музокироти Тоҷикистону Қирғизистон
Сарони давлатҳо Эмомалӣ Раҳмон ва Садир Жапаров дар маросими маҷозии бозкушоии гузаргоҳҳо дар сарҳади давлатии Тоҷикистону Қирғизистон иштирок намуданд
Имзои санадҳои нави ҳамкорӣ байни Ҷумҳурии Тоҷикистон ва Ҷумҳурии Қирғизистон
Музокироти сатҳи олии Тоҷикистону Қирғизистон
Маросими истиқболи расмии Президенти Ҷумҳурии Тоҷикистон дар Ҷумҳурии Қирғизистон
Президенти Ҷумҳурии Тоҷикистон Эмомалӣ Раҳмон дар пояи муҷассамаи «Уркун» гулчанбар гузоштанд
Президенти Ҷумҳурии Тоҷикистон Эмомалӣ Раҳмон аз Боғи миллии «Ала Арча»-и Ҷумҳурии Қирғизистон боздид намуданд
Президенти Ҷумҳурии Тоҷикистон Эмомалӣ Раҳмон бо сафари давлатӣ вориди шаҳри Бишкеки Ҷумҳурии Қирғизистон шуданд