«ТУ ҚАЛБИ ТОҶИКИСТОНӢ – ДУШАНБЕ!». Таҳти ин унвон бахшида ба Рӯзи пойтахт барномаи фарҳангӣ доир мегардад

ДУШАНБЕ, 13.04.2022. /АМИТ «Ховар»/. 16 апрел, соати 16:00 бахшида ба Рӯзи пойтахти Ҷумҳурии Тоҷикистон дар Кохи “Суруш” таҳти унвони «Ту қалби Тоҷикистонӣ – Душанбе» барномаи фарҳангӣ ва маросими ҷоизасупорӣ ба ғолибони озмунҳои шаҳрӣ баргузор мегардад. Дар ин бора сардори Раёсати фарҳанги мақомоти иҷроияи ҳокимияти давлатии  шаҳри Душанбе Нуралӣ Шоҳиён ба АМИТ «Ховар» иттилоъ дод.

Чун анъанаи солҳои қаблӣ дар Рӯзи пойтахт дар чор ноҳияи  шаҳр, бахусус дар боғҳои фарҳангу фароғатии Душанбе базмҳои идона, нишасту ҷамъомадҳо ва дигар барномаҳои гуногуни фарҳангию варзишӣ  баргузор мегарданд. Ҳамчунин дар ин рӯз  озмунҳои касбии соҳаи тандурустӣ ва маорифи  шаҳри Душанбе — «Беморхонаи сол», «Муассисаи кумаки аввалияи тиббию санитарии сол», «Табиби сол», «Табиби оилавии сол», «Корманди миёнаи тибби сол», «Мураббии сол», «Омӯзгори сол», «Хонандаи сол» ва дигар озмунҳои шаҳрӣ ҷамъбаст гардида, ғолибони он бо мукофотҳои муқаррарнамудаи мақомоти иҷроияи ҳокимияти шаҳри Душанбе сарфароз гардонида мешаванд.

15 апрел, соати 16:00 бахшида ба Рӯзи пойтахт дар боғи Садриддин Айнии ноҳияи Исмоили Сомонӣ ва соати 15:00 дар боғи Куруши Кабири ноҳияи Исмоили Сомонии пойтахт чорабиниҳои идона баргузор мегарданд.

Инчунин 16 апрел аз соати 8:00 дар боғи фарҳангию фароғатии ба номи Абулқосим Фирдавсӣ намоиш-фурӯши маҳсулоти ҳунармандӣ ва сайёҳӣ оғоз гардида,  дастовардҳои ҷавонони пойтахт низ дар ин ҷо ба намоиш гузошта мешаванд.

16 апрел дар боғи «Ҷавонон»-и пойтахт аз соати 9:00 чорабиниҳои идона оғоз мегарданд.

16 апрел, соати 09:00 бахшида ба Рӯзи пойтахт Ниммарафони XII байналмилалии Душанбе оғоз гардида, дар он варзишгарон аз минтақаҳои Ҷумҳурии Тоҷикистон, бародаршаҳрҳои Душанбе ва дигар хоҳишмандон ширкат мекунанд.

Бо мақсади дар сатҳи баланд доир намудани мусобиқа бо қарори Раиси шаҳри Душанбе муҳтарам Рустами Эмомалӣ  аз ҳисоби маблағҳои Фонди рушди пойтахт 611 530 сомонӣ ҷудо гардид.

Хотиррасон мешавем, ки тибқи Қонуни Ҷумҳурии Тоҷикистон «Дар бораи рӯзҳои ид» аз 1 марти соли 2005 ҳамасола шанбеи сеюми моҳи апрел дар  мамлакат  Рӯзи пойтахти Ҷумҳурии Тоҷикистон- шаҳри Душанбе таҷлил карда мешавад.

Мояи ифтихор аст, ки дар солҳои соҳибистиқлолӣ шаҳри Душанбе ба таври бесобиқа рушд карда, ба яке аз шаҳрҳои зеботарини минтақа табдил ёфтааст. Бо шарофати сиёсати бунёдкоронаи Пешвои миллат муҳтарам Эмомалӣ Раҳмон ва иқдомҳои созандаи Раиси ҷавони шаҳри Душанбе Рустами Эмомалӣ пойтахти ватани мо рӯз ба рӯз ободу зебо ва   макони писандидаи ҷаҳониён мегардад.

Мавриди зикр аст, ки имрӯз пойтахти Ҷумҳурии Тоҷикистон — шаҳри Душанбе узви Ассамблеяи байналхалқии пойтахтҳо ва бузургшаҳрҳо (МАГ), Ташкилоти байналхалқии бародаршаҳрҳо (МОГП), Ташкилоти Боулдер-Душанбе бародаршаҳрҳо (БДГП), Ташкилоти умумиҷаҳонии шаҳрҳои муттаҳида ва ҳокимияти маҳаллӣ (ВО ОГМВ), узви Федератсияи умумиҷаҳонии шаҳрҳои туристӣ (WTCF) буда, айни замон бо 18 шаҳри Осиё, Африқо, Аврупо, Амрико ва ИДМ муносибатҳои дӯстона ва бародарона барқарор намудааст. Ҳамчунин бо шаҳрҳои Москваи Федератсияи Русия ва Тошканди Ҷумҳурии Узбекистон дар соҳаҳои тиҷоратӣ-иқтисодӣ, илмӣ-техникӣ ва фарҳангӣ ҳамкорӣ менамояд.

Зарангези ЛАТИФ,
АМИТ «Ховар»

АКСҲО: АМИТ «Ховар»