«ҲИМОЯИ АРЗИШҲОИ МИЛЛӢ ДАР РАВАНДИ ҶАҲОНИШАВӢ». Дар ноҳияи Фархор дар ин мавзӯъ бо сокинону фаъолон вохӯрӣ доир гардид

Май 5, 2022 08:37

ДУШАНБЕ, 05.05.2022 /АМИТ «Ховар»/. 4 май дар ноҳияи Фархори вилояти Хатлон аз  ҷониби Кумитаи иҷроияи Ҳаракати ваҳдати миллӣ ва эҳёи Тоҷикистон бо сокинону фаъолон дар мавзӯи «Ҳимояи арзишҳои миллӣ дар раванди ҷаҳонишавӣ» вохӯрӣ баргузор карда шуд. Дар ин бора ба АМИТ «Ховар» дар Кумитаи иҷроияи Ҳаракати ваҳдати миллӣ ва эҳёи Тоҷикистон хабар доданд.

Дар кори вохӯрӣ роҳбари гурӯҳи корӣ, раиси Кумитаи иҷроияи Ҳаракати ваҳдати миллӣ ва эҳёи Тоҷикистон Рудобаи Мукаррам, муовини Вазири маориф ва илми Ҷумҳурии Тоҷикистон Лутфия Абдухолиқзода, директори Муассисаи давлатии «Маркази исломшиносӣ» дар назди Президенти Ҷумҳурии Тоҷикистон Абдураҳим Холиқзода, муовини аввали Раиси ноҳияи Фархор Раҳматхуҷа Камолзода суханронӣ намуданд.

Р. Камолзода баргузории вохӯрии мазкурро вобаста ба аҳамияти мавзӯъ ва вазъи сиёсии минтақа бисёр муҳим арзёбӣ кард.

Гуфта шуд, ки дар ҳудуди ҷамоатҳои шаҳраку деҳоти ноҳияи Фархор оид ба мавзӯъҳои худшиносӣ, ҳифзи арзишҳои миллӣ, эҳтиром ба муқаддасот ва дигар масъалаҳои мубрами рӯз пайваста вохӯриву суҳбатҳо гузаронида мешаванд.

Рудобаи Мукаррам дар хусуси арзишу ифтихорот ва муқаддасоти миллию давлатӣ ва нақши онҳо дар таҳкими Истиқлол ва Ваҳдати миллӣ сухан ронд.


Таъкид гардид, ки яке аз арзишҳо ё худ муқаддасоти муҳими миллати тоҷик- ин Ваҳдати миллӣ мебошад. Ваҳдати миллӣ чун ғояи иттиҳоди миллат, пойдевори ҳувият, худшиносии миллӣ ва арзиши нодири халқ дар ташаккули миллат ва давлатдории миллии тоҷикон нақши бориз гузоштааст.

«Арҷ гузоштан ба арзишҳо ва муқаддасоти миллӣ яке аз шартҳои муҳими пойдории соҳибистиқлолии давлат ва ваҳдату ҳамбастагии миллат ба шумор рафта, эҳтиром ба забон, фарҳанг, рамзҳои давлатӣ ва дигар муқаддасот қарз ва рисолати ҳар як соҳибватан маҳсуб меёбад», — тазаккур дод Р. Мукаррам.

Дар хусуси илму маърифат, зарурати андӯхтани дониш, фарҳанги техникӣ ва инкишофи тафаккури шахс, ки аз арзишҳо ва омилҳои асосии рушди давлат ба шумор мераванд, Лутфия Абдухолиқзода сухан ронд.

Ӯ зикр кард, ки арҷгузорӣ ба арзишу муқаддасоти миллӣ замоне боло меравад, ки миллат дар тамоми соҳаҳо мутахассисони касбӣ дошта бошад. Илму маърифат ва дониши баланд тафаккури шахсро рушд дода, ӯро дар баробари ғояҳои зишт ҳифз мекунад.


Мавсуф нақши ҷавононро дар арҷгузорӣ ва эҳтироми арзишу муқаддасоти миллӣ хеле баланд арзёбӣ карда, таъкид намуд, ки дар замони муосир волотарин арзиш ва муқаддасоти дилхоҳ миллат- ин соҳиби давлат будан аст. Ҳамин аст, ки барои миллатҳо ватандӯстӣ ва эҳтиром ба давлатдории миллӣ яке аз болотарин муқаддасот шинохта шудааст.

Зикр шуд, ки миллати тоҷик аз азал рӯҳи озодихоҳӣ ва истиқлолталабӣ дошт ва ҳамин талошу муборизаҳои беамони фарзандони содиқу қаҳрамон буд, ки имрӯз миллат соҳиби давлат, забон, фарҳанг ва дигар муқаддасоти миллӣ гардидааст.

Абдураҳим Холиқзода иброз дошт, ки имрӯз барои мардуми Тоҷикистон Ваҳдати миллӣ, ҳамдигарфаҳмӣ, қадршиносӣ, эҳтироми ҳамдигар, итоат ба роҳбар, ҳурмат аз қонун, илм омӯхтан, такмили мафкураи миллӣ ва сиёсӣ аз арзишҳои муҳим ба ҳисоб меравад.

«Вазифаи ҳар шаҳрванди кишвар аст, ки ба ҳифзи ин арзишҳо иқдом намояд ва барои то сатҳи муқаддасоти миллӣ боло бурдани онҳо талош варзад. Танҳо дар чунин сурат мо метавонем, ки барои насли оянда заминаи дурусти рушди маънавӣ ва мафкуравӣ фароҳам оварем», — илова намуд ӯ.

Дар қисмати охири кори вохӯрӣ намояндагони ҷомеаи шаҳрвандӣ сухан гуфта, ваъда доданд, ки муҳтавои маърӯзаҳои вохӯрии мазкурро ба самъи тамоми сокинони ноҳия мерасонанд.

АКС: Кумитаи иҷроияи Ҳаракати ваҳдати миллӣ ва эҳёи Тоҷикистон

Май 5, 2022 08:37

Хабарҳои дигари ин бахш

КӢ ХОДИМИ ДИН ШУДА НАМЕТАВОНАД. Парлумони Тоҷикистон ба қонун дар бораи озодии виҷдон ва иттиҳодияҳои динӣ тағйирот ворид намуд
Наврасони Хоруғ ба лагери дараи Ромити шаҳри Ваҳдат раҳсипор гардиданд
Дар Душанбе «Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022-2027» муаррифӣ шуд
13 деҳаи ноҳияи Файзобод бо фарогирии 19717 нафар аҳолӣ бо оби тозаи нӯшокӣ таъмин карда мешаванд
Музаффар Ашуриён дар Форуми 10-уми байналмилалии ҳуқуқӣ дар Санкт-Петербург иштирок дорад
Омӯзгорону касбомӯзони «Маркази таълими калонсолони Тоҷикистон» барои ҳайати Узбекистон дарси маҳорат гузарониданд
Дар Ҷамоати деҳоти Ворухи Исфара пас аз офати табиӣ дастрасӣ ба оби нӯшокӣ ва полезӣ таъмин гардид
МОҲИ ИЮЛ ТОҶИКИСТОНИЁНРО ЧӢ ГУНА ҲАВО ИНТИЗОР АСТ? Ба ин суоли АМИТ «Ховар» муовини Директори Агентии обуҳавошиносӣ Ҷамила Байдуллоева посух дод
ЭҲТИЁТ ШАВЕД, «ЧИЛЛА»-И ТОБИСТОН! Дар Тоҷикистон ин рӯзҳо ҳарорати ҳаво то ба 45 дараҷа мерасад
Дар ноҳияи Кӯшониён пули дарозиаш 85-метра ба истифода дода шуд
Корҳои кашидани хатти оби нушокӣ аз деҳаи Калтачинор ба маркази ноҳияи Балҷувон оғоз гардиданд
Ба Тоҷикистон беш аз 200 ҳазор воя ваксинаи намуди «Pfizer» ворид карда шуд