Шаби 30 ба 31 май аз бурҷи Геркулес бориши борони метеорӣ пешбинӣ шудааст

Май 23, 2022 10:06

ДУШАНБЕ, 23.05.2022 /АМИТ «Ховар»/. Шаби 30 ба 31 майи соли 2022 ба сайёраи Замин аз бурҷи Геркулес бориши борони метеорӣ дар назар аст, иброз намуд директори Институти астрофизикаи Академияи миллии илмҳои Тоҷикистон (АМИТ) Гулчеҳра Қоҳирова ба АМИТ «Ховар».

«Дар ин шаб имкон аст, ки мо яке аз калонтарин ҳодисаи борони метеориро мушоҳида намоем. Ин борон  бо сели  метеории Тау Геркулид ба вуҷуд меояд.  Радианти сел (нуқтаи кураи осмонӣ, ки аз он метеорҳо пайдо мешаванд) дар наздикии ситораи Тау дар бурҷи Геркулес ҷойгир аст ва аз ин сабаб ин сели метеориро Тау Геркулид меноманд. Кометаи 73P/Швассман-Вахман ҷирми волидайни метеорҳои Тау Геркулид мебошад»,-гуфт Гулчеҳра Қоҳирова.

Ба иттилои мавсуф, ин комета соли 1995 пора-пора шуда, ҳангоми порашавӣ дурахшонии он  400 маротиба равшантар гардид. Астрономҳо ин фаъолиятро 1400 метеор дар як соат ва ҳатто бештар аз он ҳисоб ва ин падидаро ҳамчун борони метеорӣ тавсиф мекунанд.

Ба гуфтаи ӯ,  чун дар ҳама гуна пешгӯиҳо кафолати пурра мавҷуд нест, ки ягон зуҳуроти табиӣ ҳатман рух диҳад. Дар гузашта астрономҳо борҳо борони метеорҳоро аз селҳои гуногуни метеорӣ пешгӯӣ карда буданд, лекин онҳо амалӣ нашуданд. Аммо ин фурсати хубест ва меарзад, ки чанд соат ба осмони шаб нигоҳ карда, манзараи аҷибро интизор шавем.

Одамон шояд борҳо ҳодисаҳои метеорро мушоҳида карда бошанд, зеро дар ҳар дақиқа як ё ду метеор (ситораи паррон, шиҳоб) дар осмони шаб пайдо мешаванд.

Хотиррасон менамоем, ки воридшавии ҷирми хурди кайҳонӣ (андозаашон аз микронҳо то якчанд см)-ро ба атмосфераи Замин ҳодисаи метеорӣ меноманд.  Ҳангоми гузаштани Замин аз думи боқимондаи комета баъзан борони метеорӣ ба амал меояд,  ки дар натиҷа дар як соат ҳазорҳо метеорҳо ва ҳатто дар як сония як метеорро дидан мумкин аст.

АКС: Институти астрофизикаи АМИТ

Май 23, 2022 10:06

Хабарҳои дигари ин бахш

Дар Бадахшон қуллаҳои Маяковский ва Октябрский расман ба номи шоирон Мирсаид Миршакар ва Мўъмин Қаноат номгузорӣ шуданд
Дар Душанбе таҳти унвони «Омилҳои ташаккули матбуоти даврии тоҷик дар солҳои 1920-1930» ҳамоиш баргузор гардид
Бо ташаббуси Кумитаи иҷроияи ҲХДТ дар шаҳри Турсунзода толори фарҳангӣ мавриди баҳрабардорӣ қарор гирифт
Ду шабакаи телевизиони Тоҷикистон ба пахши моҳворавӣ пайваст мешаванд
ЭЙ ВАТАН, ЭЙ ТОҶИКИСТОН, ЭЙ БИҲИШТИ МАН! Шеъри тозаэҷоди Шоири халқии Тоҷикистон Камол Насрулло ба шарафи Рўзи Ваҳдати миллӣ
«САДОИ АДИБОНИ ДУНЁ ДАР ВАСФИ ТОҶИКИСТОН». Таҳти ин ном маҷмӯаи хотироти адибони ҷаҳон бо забони асл ва дар тарҷумаи тоҷикӣ ба нашр расид
«Сулҳ ройгон ба даст наомадааст, бояд ба қадраш бирасем!»,- шарҳи матбуоти даврии Тоҷикистон
Дар Осорхонаи миллии Тоҷикистон мусаввараҳои рассомони рус ба намоиш гузошта шуданд
Дар Ҳисор маҳфили эҷодии Нависандаи халқии Тоҷикистон Кароматуллоҳи Мирзо доир гардид
ШЕЪРИ ТОҶИК ДАР СУРИЯ. Дар Димишқ маҷмӯаи ашъори панҷ шоири шинохтаи Тоҷикистон ба забони арабӣ таҳти унвони «Ҳамосаи панҷгона» ба табъ расид
Пагоҳ дар саҳни Театри опера ва балети шаҳри Душанбе намоиш-фурӯши китоби «Маснавии маънавӣ»-и Ҷалолуддини Балхӣ доир мегардад
Китоби «Насими дӯстӣ»-и Абдуҷаббор Раҳмонзода аз таърихи дӯстию бародарии халқҳои тоҷику узбек ҳикоят мекунад