Академияи идоракунии давлатӣ дар ҳамкорӣ бо Дафтари СММ-занон дар Тоҷикистон даври аввали машварати омӯзишӣ доир кард

ДУШАНБЕ, 30.07.2022 /АМИТ «Ховар»/. Дар доираи ҳамкории Академияи идоракунии давлатии назди Президенти Ҷумҳурии Тоҷикистон бо Дафтари СММ-занон дар Тоҷикистон даври аввали машварати омӯзишӣ аз рӯйи барномаи «Банақшагирии буҷет бо дарназардошти ҷанбаҳои гендерӣ: ҳадафҳо, вазифаҳо ва дурнамо» барои хизматчиёни давлатии мақомоти марказӣ ва маҳаллии ҳокимияти давлатӣ (аз ҳисоби масъулони таҳияи буҷет) доир шуд, хабар доданд ба АМИТ «Ховар» дар Академияи идоракунии давлатӣ.

Зимни ифтитоҳи курс ректори Академияи идоракунии давлатӣ Абдухалил Ғафурзода, муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон Умеда Абдуллозода ва намояндаи Дафтари СММ-занон дар Тоҷикистон Нушофарин Нозирӣ иштирок намуданд.

Ректори Академияи идоракунии давлатӣ Абдухалил Ғафурзода иброз дошт, ки «омӯзондани масъалаҳои таъмини баробарии гендерӣ барои хизматчиёни давлатӣ, хусусан барои онҳое, ки дар сатҳи қабули қарор фаъолият мекунанд, хеле муҳим буда, Академияи идоракунии давлатӣ дар барномаҳои таълимии курсҳои такмили ихтисоси хизматчиёни давлатӣ мунтазам мавзӯъҳоро вобаста ба қонунгузории гендерӣ, санадҳои барномавӣ дар ин самт, мавқеи бонувон дар ҷомеа ва роҳу усулҳои бартараф кардани қолабҳои гендерӣ пешбинӣ менамояд».

Илова бар ин, дар доираи татбиқи Стратегияи миллии рушди Ҷумҳурии Тоҷикистон барои давраи то соли 2030, Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021-2030 бо мақсади таҳким бахшидани фаъолият дар самти таъмини баробарии гендерӣ, тақвият додани донишҳои хизматчиёни давлатӣ дар ин самт, таҳлилу таҳқиқи масъалаҳои соҳа, тайёр кардани теъдоди бештари кадрҳои роҳбарикунанда аз ҳисоби занон, дастгирии бонувони лаёқатманд дар хизмати давлатӣ ва идоракунии давлатӣ дар Академияи идоракунии давлатӣ дар мувофиқа бо Президенти мамлакат бо дастгирии сохтори СММ-занон Маркази омӯзишӣ ва дастгирии занони роҳбарикунанда ва болаёқат таъсис дода шуд.

Банақшагирии буҷет бо дарназардошти ҷанбаҳои гендерӣ яке аз роҳҳои самарабахши таъмини баробарии гендерӣ дониста мешавад.

Ҳоло аз ҷониби коршиносони интихобнамудаи Дафтари СММ-занон дар Ҷумҳурии Тоҷикистон модули таълимии банақшагирии буҷет бо дарназардошти ҷанбаҳои гендерӣ таҳия гардидааст.

Дар марҳилаи аввал бо истифода аз усулҳои муосири таълим ба 80 нафар кормандони мақомоти давлатӣ роҳҳои ба инобат гирифтани масъалаҳои таъмини баробарии гендерӣ зимни таҳияи буҷет дар ҳамаи сатҳҳо омӯзонида мешаванд.

Дар ҳар даври омӯзишӣ иштироки 20 нафар хизматчии давлатӣ дар назар дошта шудааст. Дар ҷамъбасти курс ба шунавандагон гувоҳнома оид ба такмили ихтисос дода шуда, ҳамзамон шунавандаҳои фаъоли курс бо туҳфаҳои хотиравӣ ҳавасманд карда мешаванд.

АКС: Академияи идоракунии давлатии назди Президенти ҶТ