ДАСТОВАРД. Хонандаи Литсейи шаҳри Хуҷанд ғолиби олимпиадаи байналмиллалӣ, соҳиби шоҳҷоиза ва 16 ҳазор доллари амрикоӣ гардид

Июль 5, 2022 10:36

ДУШАНБЕ, 05.07.2022 /АМИТ «Ховар»/. Хонандаи синфи 11-и Литсей барои хонандагони болаёқат дар шаҳри Хуҷанд Фирдавс Муҳаммадҷонов дар олимпиадаи байналмиллалии ISPT — Қазоқистон 2022, ки аз ҷониби Донишгоҳи Қазоқистон ба номи Сулаймон Демирел баргузор карда шуд, иштирок намуда, бо ба даст овардани бештарин хол мақоми аввалро ишғол намуда, соҳиби Шоҳҷоиза — гранти омӯзишӣ ба маблағи беш аз 16 ҳазор доллари амрикоӣ ва имкони таҳсили ройгон дар дилхоҳ риштаи донишгоҳи мазкур гардид. Дар ин бора АМИТ «Ховар» бо истинод ба иттилои директори Литсей барои хонандагони болаёқат дар шаҳри Хуҷанд Сурайё Неъматзода хабар медиҳад.

Мавриди зикр аст, ки ҳамасола Донишгоҳи мазкур ба хотири дарёфти хонандагони болаёқат байни 30 кишвари олам олимпиадаи байналмилалӣ баргузор намуда, ба 12 нафар хонандагон аз тамоми олам Шоҳҷоиза — бурсияи таҳсили ройгон дар Донишгоҳро  медиҳад.

Имсол дар олимпиадаи ин Донишгоҳ 90 нафар хонандагони синфи 11 аз Тоҷикистон иштирок намуда, танҳо ба Фирдавс Муҳаммадҷонов муяссар гардид, ки соҳиби Шоҳҷоиза (гранти 100 фоиза)-и олимпиадаи мазкур гардад.

Ёдовар мешавем, ки Донишгоҳи Сулаймон Демирели кишвари Қазоқистон бо 21 донишгоҳои бонуфузтарин давлатҳои ҷаҳон аз ҷумла: Амрико, Англия, Кореяи Ҷанубӣ, Фаронса, Австралия ҳамкорӣ дошта, донишҷӯён имкон доранд ба ин давлатҳо ба муҳлати аз 6 — моҳ то 1- сол сафар шуда, барои омӯзиши илм ва сайқал додани дониш таҷрибаомузӣ намоянд.

Донишгоҳи мазкур ба гурӯҳи донишгоҳҳои бонуфузи қораи Осиё шомил буда, 4 соли омӯзиш дар ин донишгоҳ наздик ба 16 ҳазор доллари амрикоӣ мебошад.

Фирдавс Муҳаммадҷонов — хонандаи Литсей барои хонандагони болаёқат дар шаҳри Хуҷанд яке аз аз омилҳои ба ин муваффақияти комил расидани худро дар омӯхтани фанҳои таълимӣ бо забони англисӣ дар Литсей медонад.

Ӯ мегӯяд, дар раванди иштирокаш дар озмуни Донишгоҳи давлатии Қазоқистон ба номи Сулайман Демирел ӯ аз ду фан- забони англисӣ ва математика имтиҳони тестӣ супорида, дар озмун ғолиб гардид.

Фирдавс Муҳаммадҷонов аллакай ихтисоси худро дар Донишгоҳи мазкур интихоб намудааст, ӯ дар риштаи технологияи иттилоотӣ таҳсилашро идома дода, дар давоми донишҷӯияш барои омӯхтани таҷрибаи илмӣ донишгоҳи Амрикоро интихоб намудааст.

Дар воқеъ, омӯзгорони ин боргоҳи таълими дастовардҳои худро дар иртибот ба таъкидҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бобати донистани забони англисӣ барои мутахассисони соҳаи мамлакат, дастгириҳои пайвастаи Ҳукумати Ҷумҳурии Тоҷикистон ва Вазорати маориф ва илми Ҷумҳурии Тоҷикистон медонанд.

Лозим ба таъкид аст, ки танҳо дар соли хониши 2021-2022 хонандагони Литсей барои хонандагони болаёқат дар шаҳри Хуҷанд дар беш аз 15 олимпиадаҳои фаннии сатҳи ҷаҳонӣ дар кишварҳои Амрико, Туркия, Таиланд, Малайзия, Сингапур, Бразилия, Русия, Ҳиндустон, Олмон, Британияи Кабир ва Фаронса иштирок намуда, соҳиби 493 медалҳои тилло, нуқра ва биринҷӣ гардиданд.

Ҳамзамон 32 нафар хатмкунандагони ин боргоҳи таълимӣ соҳиби грантҳои омӯзишӣ дар кишварҳои Швейтсария, Англия, Сингапур, Италия, Олмон, Туркия ва Фаронса гардида, ҳамчунин 12 нафар дар озмунҳои бурсияи донишгоҳҳои Штатҳои Муттаҳидаи Амрико ғолиб омада, соҳиби беш аз 2,5 миллион доллари амрикоӣ грантҳои омӯзишӣ дар беш аз 20 Донишгоҳҳои бонуфузи Амрикоӣ гардиданд. Лозим ба таъкид аст, ки ба даст овардани бурсияҳо имкон медиҳад, то хонандагон дар беҳтарин донишгоҳҳои ҷаҳон ройгон таҳсил намуда, аз фановариҳои муосир баҳравар гарданд.

АКС: Литсей барои хонандагони болаёқат дар шаҳри Хуҷанд

Июль 5, 2022 10:36

Хабарҳои дигари ин бахш

Донишҷӯёни Тоҷикистон имкони дар Донишгоҳи шаҳрсозии Тянҷин идома додани таҳсилро доранд
ТАЪТИЛИ ТОБИСТОНА. Лагери дараи Камароби ноҳияи Рашт 150 хонандаро дар се давр ба истироҳат фаро мегирад
Хонандагони тоҷик дар олимпиадаи байналмилали соҳиби ҷойи дуюм шуданд
Ҳамкории Донишгоҳи техникии Тоҷикистон бо Донишгоҳи илм ва технологияи AGH-и Лаҳистон густариш меёбад
Даврон Сафарзода: «Олимони тоҷик минбаъд низ бояд барои расидан ба ҳадафҳои стратегии давлат саҳм гузоранд»
«МАЪРИФАТИ ҲУҚУҚӢ-ОЙИНИ ХУДШИНОСӢ». Дар пойтахт даври шаҳри озмуни ҷумҳуриявӣ баргузор гардид
Олимпиадаи ҷумҳуриявӣ барои дарёфти «Ҷоми Кумита оид ба таҳсилоти ибтидоӣ ва миёнаи касбӣ» ҷамъбаст гардид
Дар Донишгоҳи байналмилалии забонҳои хориҷии Тоҷикистон оид ба «Истифодаи оқилонаи захираҳои об дар шароити тағйирёбии иқлим» ҳамоиш баргузор шуд
НАҚШИ ПЕШВОИ МИЛЛАТ ДАР ГУСТАРИШИ МАЪРИФАТИ ҲУҚУҚИИ ҶОМЕА. Доир ба он дар Донишгоҳи миллӣ конфронси ҷумҳуриявӣ баргузор шуд
«ДУРНАМОИ РУШДИ ИЛМИ ТАЪРИХИ ВАТАНӢ». Дар ҳошияи мулоқоти Президенти Тоҷикистон бо аҳли илм ва маорифи ҷумҳурӣ ҳамоиш доир шуд
Даври ниҳоии олимпиадаи ҷумҳуриявӣ барои дарёфти «Ҷоми Кумита оид ба таҳсилоти ибтидоӣ ва миёнаи касбӣ» оғоз гардид
ОҒОЗИ ДАВРИ ДУЮМИ БАҚАЙДГИРӢ. Тибқи иттилои Маркази миллии тестӣ он то 30 июн идома меёбад