ДУШАНБЕ, 07.07.2022. /АМИТ «Ховар»/. Дирӯз фармоиши Вазири маориф ва илми Ҷумҳурии Тоҷикистон дар бораи таъйини муовини ректори ДМТ оид ба робитаҳои байналмилалӣ Ғаффорзода Илёсҷон Ғаффор ба Шӯрои олимон ва Шӯрои омӯзгорони Донишгоҳи миллии Тоҷикистон расонида шуд, хабар медиҳад мухбири АМИТ.

Ректори ДМТ Қобилҷон Хушвахтзода зимни муаррифии муовини нав аз эътимоди баланди Ҳукумати Ҷумҳурии Тоҷикистон, ки муассиси донишгоҳ аст, ёдовар шуда, зикр намуд, ки номзадии И. Ғаффорзода ба ин мақом бо Ҳукумати мамлакат мувофиқа шудааст.

Ректор И. Ғаффорзодаро яке аз ҷавонтарин докторони илм ва профессорони Тоҷикистон номид. Роҳбари донишгоҳ таъкид кард, ки ДМТ барои рушду афзоиши заминаи баландсифат омӯзгорони соҳибихтисос ва ҷавонони болаёқат дорад. «Рушди минбаъдаи ояндаи Тоҷикистон аз мутахаассиони ҷавони сатҳи касбиашон баланд вобаста аст», — гуфт Хушвахтзода.

Илёсҷон Ғаффорзода 8 декабри соли 1987 дар Ҷумҳурии Тоҷикистон таваллуд шудааст. Соли 2009 шуъбаи рӯзонаи факултети ҳуқуқшиносии Донишгоҳи миллии Тоҷикистонро аз рӯйи ихтисоси ҳуқуқшинос бо дипломи аъло хатм намудааст. Дар вазифаҳои зерин фаъолият кардааст: ассистенти кафедраи ҳуқуқи граждании факултети ҳуқуқшиносии ДДМТ (2009-2013), муаллими калони кафедраи ҳуқуқи граждании факултети ҳуқуқшиносии ДМТ (2013-2015), дотсенти кафедраи ҳуқуқи граждании факултети ҳуқуқшиносии ДМТ (2015), муовини декани факултети ҳуқуқшиносии ДМТ (2014-2015), мудири шуъбаи таҷрибаомӯзӣ ва кор бо мутахассисони ҷавони ДМТ (2015-2019). Аз соли 2019 номбурда дар вазифаи директори Донишкадаи такмили ихтисоси омӯзгорони муассисаҳои таҳсилоти олии касбии Ҷумҳурии Тоҷикистон дар назди Донишгоҳи миллии Тоҷикистон кор кардааст.

И. Ғаффорзода солҳои 2010-2013 аспиранти кафедраи ҳуқуқи граждании ДМТ буда, солҳои 2013-2015 магистратураи ДМТ-ро аз рӯи ихтисоси молия ва қарз (иқтисодчӣ) хатм намудааст.

Соли 2014 рисолаи номзадиашро дар мавзӯи «Табиати ҳуқуқии шартномаҳои муаллифӣ тибқи қонунгузории Ҷумҳурии Тоҷикистон» ва соли 2021 рисолаи докториашро дар мавзӯи «Проблемаҳои вазъи ҳуқуқии кӯдак тибқи қонунгузории Ҷумҳурии Тоҷикистон: таҳқиқоти сивилистӣ» ҳимоя намудааст.

Хизматҳои шоистаи олими ҷавон И. Ғаффорзода бо Ҷоизаи ба номи Исмоили Сомонӣ барои олимони ҷавон дар соҳаи илмҳои гуманитарӣ (2018), Ифтихорномаи Вазорати маориф ва илми Ҷумҳурии Тоҷикистон (2015), нишони «Аълочии маориф ва илми Ҷумҳурии Тоҷикистон» (2020), Ифтихорномаи ДМТ ва бо сипосномаю раҳматнома ва медалҳои ҷашнии чанде аз сохторҳои гуногуни ҷумҳурӣ қадр гардидаанд.

И Ғаффорзода яке аз ҷавонони масъулиятшинос ва ҷӯянда буда, дар робита ба мавзӯъҳои илмиаш таҳқиқоти арзишманде ба сомон расонидааст ва пашӯҳишҳояш дар 7 монография, зиёда аз 20 дастури таълимию методӣ ва беш аз 90 интишороти илмӣ инъикос гардидаанд. Инчунин, бо мақсади иштирок дар конференсияҳои илмӣ ва иҷрои корҳои илмӣ, ҳамзамон ҷиҳати рушд бахшидани фаъолияти корӣ ба чанде аз давлатҳо, аз ҷумла ба Русия, Олмон, Австрия, Италия, Ҷумҳурии Мардумии Чин, Туркия, Қазоқистон, Узбекистон, Фаронса ва Англия сафар намудааст.

Оиладор, соҳиби 3 фарзанд мебошад.

Зарангези ЛАТИФ,
АМИТ «Ховар»

АКС: Хадамоти матбуоти Президенти Ҷумҳурии Тоҷикистон/ АМИТ «Ховар»