Тоҷикистон ва Туркия нақша доранд дар соҳаи ҳифзи муҳити зист лоиҳаҳои нави муштарак таҳия намоянд

ДУШАНБЕ, 29.07.2022 /АМИТ «Ховар»/. 28 июл мулоқоти Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Баҳодур Шерализода ва Сафири Фавқулода ва Мухтори Ҷумҳурии Туркия дар Тоҷикистон Эмре Зеки Карагёл баргузор гардид, ки зимни он ҷонибҳо ба хулосае омаданд, ки якҷоя масъалаи мубодилаи сафарҳои омӯзиширо дар сатҳи техникӣ ба роҳ монанд, хабар медиҳад АМИТ «Ховар» бо истинод ба Кумитаи ҳифзи муҳити зист.

Дар вохӯрӣ масъалаҳои марбут ба ҳифзи муҳити зист, тағйирёбии иқлим ва муомилот бо партовҳо низ мавриди баррасӣ қарор гирифтанд.

Эмре Зеки Карагёл Раиси Кумитаро бо навовариҳои ин самт дар Туркия, алалхусус оид ба ташаббуси хонум Эмине Эрдоған оид ба лоиҳаи «Сифр партов» шинос намуд.

Дар анҷоми мулоқот Баҳодур Шерализода ба Эмре Зеки Карагёл барои саҳми пурарзиш дар густариши ҳамкории дуҷонибаи давлатҳо, алалхусус дар самти ҳифзи муҳити зист миннатдорӣ баён намуд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон