«Ҳосилот» ва «Кӯктош» дар даври сенздаҳуми Чемпионати Тоҷикистон миёни дастаҳои Лигаи якум ғолиб омаданд

ДУШАНБЕ, 23.08.2022 /АМИТ «Ховар»/. Бозиҳои даври сенздаҳуми Чемпионати Тоҷикистон оид ба футбол миёни дастаҳои Лигаи якум дар варзишгоҳҳои мамлакат ҷолиб баргузор гардиданд. Дар ин бора ба шореҳи варзиши АМИТ «Ховар» дар Федератсияи футболи Тоҷикистон хабар доданд.

Ҷолибтарин рақобати даври мазкур — ин бозии дастаҳои футболи «Ҳосилот»-и ноҳияи Фархор ва «Ҳулбук»-и ноҳияи Восеъ буд, ки дастаи «Ҳосилот»-и ноҳияи Фархор бо бартарияти ду гол тавонист ҳарифи асливу усулии худро шикаст диҳад.

Аз бозии дастаҳои футболи «Ваҳдат»-и шаҳри Ваҳдат ва «Кӯктош»-и ноҳияи Рӯдакӣ интизорӣ хеле зиёд буд ва мухлисон ҳатто ҳадс мезаданд, ки дастаи «Кӯктош» бо бартарияти 10 гол ғалаба мекунад. Бозӣ бо ҳисоби 3 бар 0 ба фоидаи дастаи «Кӯктош» анҷом ёфт.

Дастаҳои заифтарини чемпионат «Моҳир»-и ноҳияи Ёвон ва «Сарҳадчӣ»-и ноҳияи Ҳамадонӣ буданд, ки мухлисон ҳатто шоҳиди як гол ҳам нагаштанд.

Бозиҳои даври 13-уми чемпионати Тоҷикистон оид ба футбол миёни дастаҳои Лигаи якум ба таври зайл сурат гирифтанд:

Душанбе 1:1 Гулистон

Ваҳдат 0:3 Кӯктош

Моҳир 0:0 Сарҳадчӣ

Саройкамар: Барқчӣ (мавқуф)

Ҳосилот 2:0 Ҳулбук

Динамо 3:1 Панҷшер

АКС: Федератсияи футболи Тоҷикистон