Дар Душанбе ҷаласаи навбатии Шӯрои занону духтарон баргузор шуд

ДУШАНБЕ, 15.09.2022 /АМИТ «Ховар»/. Дар Кумитаи кор бо занон ва оилаи назди Ҳукумати Ҷумҳурии Тоҷикистон ҷаласаи навбатии Шӯрои занону духтарони вазорату идораҳо ва донишгоҳу донишкадаҳои пойтахт баргузор гардид, хабар медиҳад АМИТ «Ховар».

Дар ҷаласа Раиси Кумитаи кор бо занон ва оилаи назди Ҳукумати Ҷумҳурии Тоҷикистон Ҳилолбӣ Қурбонзода, муовини Раиси Ҳизби Халқии Демократии Тоҷикистон Хайриниссо Юсуфӣ, муовини Вазири маориф ва илм Лутфия Абдухолиқзода, муовини Бонки миллии Тоҷикистон Гулбаҳор Назирӣ, муовини якуми Раиси Кумитаи кор бо ҷавонон ва варзиш Шабнам Раҳимзода, прокурори калони Раёсати Прокуратураи генералии Ҷумҳурии Тоҷикистон Ҳувайдо Сайаълозода ва намояндагони дигар вазорату идораҳо иштирок намуданд.

Дар ҷаласа оид ба пешгирии ҳолатҳои номатлуби ҷомеа, аз ҷумла, шомилшавии занону ҷавонон ба гурӯҳҳои террористию экстремистӣ, коҳиш додани сатҳи ҷинояткорӣ, пошхӯрии оилаҳо, зӯроварӣ дар оила ва касалиҳои сироятӣ сухан гуфта шуд.

Ҳамзамон иштирокдорон вобаста ба масъалаи ҷалби насли наврасу ҷавон ба омӯхтани касбу ҳунар, баланд бардоштани ҳисси ватандӯстию ифтихори миллӣ, масъулиятшиносӣ изҳори назар намуданд.

АКС: Кумитаи кор бо занон ва оилаи назди Ҳукумати ҶТ