БА ИСТИҚБОЛИ 30-СОЛАГИИ ИҶЛОСИЯИ XVI ШӮРОИ ОЛӢ. Дар Ёвон пули мошингузар ба истифода дода шуд

ЁВОН, 26.10.2022 /АМИТ «Ховар»/. Ба ифтихори ҷашни 30-солагии Иҷлосияи XVI Шӯрои Олии Ҷумҳурии Тоҷикистон дар деҳаи Ҳасании Ҷамоати деҳоти Ҳасан Ҳусейнови ноҳияи Ёвон пули мошингузар мавриди баҳрабардорӣ қарор дода шуд. Дарозии он 40 метр ва паҳноияш 3,6 метр буда, иқтидори вазнбардориаш 30 тоннаро ташкил медиҳад. Он аз ҷониби соҳибкорони маҳаллӣ маблағгузорӣ шуда, тариқи ҳашари дастҷамъонаи сокинон бунёд гаштааст. Дар ин бора дар Мақомоти иҷроияи ҳокимияти давлатии ноҳияи Ёвон ба хабарнигори АМИТ «Ховар» Субҳониддини МАҲМУД иттилоъ доданд.

Баробари ба истифода додани ин пул мушкилии мардуми деҳа бартараф шуд, зеро то кушодашавии он сокинон тавассути сангоби дарёчаи Ёвонруд рафтуомад доштанд.

Дар кушодашавии пули мазкур Раиси ноҳия Ҷамшед Саидзода иштирок намуда, ба саховатмандони маҳалла барои саҳми арзанда гузоштан дар амалӣ гардонидани сиёсати созандаю бунёдкоронаи Президенти Ҷумҳурии Тоҷикистон муҳтарам Эмомалӣ Раҳмон Сипосномаи Мақомоти иҷроияи ҳокимияти давлатии ноҳияи Ёвонро тақдим намуд.

Дар ноҳияи Ёвон ба муносибати таҷлили сазовори ҷашни фархундаи 35-солагии Истиқлолияти давлатии Ҷумҳурии Тоҷикистон корҳои бунёдкориву ободонӣ равнақи тоза пайдо намуда истодаанд. То таҷлили ин санаи таърихӣ 498 иншооти таъйиноти гуногун бунёд мегарданд, ки аз ин шумора 34 адад коргоҳу корхонаҳои нави саноатӣ, 50 адад иншооти соҳаи тандурустӣ, 46 адад иншооти соҳаи маориф, 10 адад иншооти фарҳангӣ, 20 адад иншооти соҳаи варзиш, 23 адад иншооти соҳаи кишоварзӣ, 30 адад иншооти соҳаи сайёҳӣ ва ҳунарҳои мардумӣ, 142 адад иншооти хизматрасонию савдо ва 52 адад иншооти гуногуни дигар мебошанд.

АКС: Мақомоти иҷроияи ҳокимияти давлатии ноҳияи Ёвон