Дар интихоботи Бразилия собиқ президент Лула да Силва пирӯз гардид

ДУШАНБЕ, 31.10.2022 /АМИТ «Ховар»/. Асосгузори Ҳизби чапгарои коргарӣ ва президенти собиқ Лула да Силва дирӯз дар даври дуюми интихоботи президентии Бразилия пирӯз гардид. Тибқи натиҷаҳои ниҳоии Додгоҳи олии интихоботӣ (он вазифаи КМИ-ро дар кишвар иҷро мекунад), ба тарафдории ӯ 51 дарсади интихобкунандагон овоз додаанд, хабар медиҳад АМИТ Ховар бо истинод ба агентии  Euronews.com.

Аз оғози шумориши овозҳо сарвариро роҳбари кунунии давлат Жаир Болсонару ба даст овард, вале баъдан Лула да Силва аз ӯ пеш гузашт. Жаир Болсонару тақрибан 49% овозҳоро соҳиб шудааст.

Қаблан хабар расида буд, ки дар интихобот 9 номзади дигар низ ширкат кардаанд. Овоздиҳӣ дар Бразилия барои беш аз 156 миллион шаҳрвандони ин кишвар, ки ҳуқуқи овоздиҳӣ доранд, ҳатмист. Жаир Болсонару баъди чор соли сарварӣ бори дуюм номзад шуд.

Лула Да Силва бори нахуст соли 2002 мансаби президентиро соҳиб шуда, пас аз чор сол муваффақона дубора интихоб гардид. 12 июли соли 2017 ӯро бо иттиҳоми фасод ва шустушӯи пул ба 9,5 соли зиндон маҳкум намуданд. Моҳи ноябри соли 2019 ӯ озод гардид. Моҳи марти соли 2021 Додгоҳи олии федералии Бразилия ҳамаи иттиҳомот нисбат ба ӯро лағв кард.

Акс: CARL DE SOUZA / AF