ҶОМИ ОСИЁ ОИД БА ФУТЗАЛ. Тоҷикистон бо ду ғалаба ва ду бохт бозиҳои Ҷоми Осиё-2022-ро анҷом дод

ДУШАНБЕ, 05.10.2022. /АМИТ «Ховар»/. Дастаи мунтахаби футзали Тоҷикистон таҳти роҳбарии сармураббӣ Пайрав Воҳидов ҳунарнамоии худро дар Ҷоми Осиё-2022 дар Кувайт анҷом дод, хабар медиҳад шореҳи варзиши АМИТ «Ховар» бо истинод ба  Федератсияи футболи Тоҷикистон.

Дар даври чорякфиналӣ дастаи мунтахаби Тоҷикистон  дар муборизаи бисёр ҳассос аз дастаи мунтахаби футзали  Таиланд бо ҳисоби 2:3 мағлуб шуд. Футболбозони тоҷик дар қисми аввал қариб бо ҳисоби 0:1 шикаст мехӯрданд, вале дар қисми дуюми бозӣ онҳо на танҳо натиҷаро баробар карданд, балки бо ҳисоби 2:1 ба пеш баромаданд. Дар лаҳзаҳои охир футболбозони Таиланд боз пешсафиро соҳиб шуда, 30 сония қабл аз садои ҳуштаки ниҳоӣ таиландиҳо голи пирӯзиоварро ба нишон  расониданд.

Голҳоро дар ҳайати  дастаи мунтахаби  Тоҷикистон Иқбол Воситзода ва Идрис Ёров ба ҳадаф расониданд. Дар марҳилаи гурӯҳии Ҷоми Осиё-2022 шогирдони Пайрав Воҳидов бар Баҳрайн (4:3) ва Туркманистон (8:5) пирӯз шуда, аз дастаи мунтахаби  Узбекистон (2:3) шикаст хӯрданд.

Ба марҳилаи нимниҳоии Ҷоми Осиё-2022 дар баробари Таиланд, инчунин дастаҳои мунтахаби  футзали Эрон, Ҷопон ва Узбекистон баромаданд.

                                                                                                                 Акс: ФФТ