СУХАНРОНИИ Президенти Ҷумҳурии Тоҷикистон Эмомалӣ Раҳмон дар ҳамоиш дар сиғаи «Осиёи Марказӣ + Россия»

Октябрь 14, 2022 21:26

14.10.2022, Қазоқистон

Ҳамтоёни муҳтарам,

Мо аз Президенти Федератсияи Россия муҳтарам Владимир Владимирович Путин барои ташаббуси баргузории ҳамоиши аввалин дар сиғаи Осиёи Марказӣ – Россия миннатдорем.

Мо ба Президенти Ҷумҳурии Қазоқистон муҳтарам Қосим-Жомарт Кемелевич Токаев барои ташкили мулоқоти имрӯза изҳори сипос мекунем.

Он дар соли ҷашнии барқарории муносибатҳои дипломатӣ миёни давлатҳои Осиёи Марказӣ ва Россия сурат мегирад.

Тайи давраи гузашта мо тавонистем ба сатҳи баланди ҳамкории дуҷониба дар бахшҳои сиёсӣ, тиҷоратӣ, иқтисодӣ, фарҳангӣ, гуманитарӣ ва ғайра ноил шавем.

Ҳамкорӣ дар чаҳорчӯби СММ ва дигар созмонҳои байналмиллалию минтақавӣ ба таври зарурӣ инкишоф ёфтааст.

Дар шароити дигаргуниҳои босуръати сиёсати ҷаҳонӣ ва иқтисодиёт муколамаи ошкоро ва боэҳтиром миёни мамлакатҳои мо аҳамияти махсус пайдо мекунад.

Мо пешниҳоди ҷониби Россияро дар бораи таъсиси доираҳои муколамаи шашҷониба барои баррасии масъалаҳои мубрами соҳаҳои афзалиятноки кишварҳоямон истиқбол мекунем.

Мо омодаем чунин ҳамкориро дар бахшҳои тиҷорат, нақлиёт ва иртиботот, дар самтҳои маориф, ҳамкории башардӯстона ва муқовимат ба чолишҳо ва таҳдидҳои нав роҳандозӣ кунем.

Ҳамтоёни муҳтарам,

Дар шароити кунунӣ масъалаи таъмини амният аҳамияти махсус пайдо мекунад.

Дар минтақаи мо авҷи шиддат вобаста ба фаъолияти гурӯҳҳои террористиву экстремистӣ коҳиш намеёбад, мафкураи радикализми динӣ фаъолона паҳн шуда, ҳаҷми муомилоти ғайриқонунии маводи мухаддир ба маротиб афзуда, гардиши ҷиноятҳои муташаккили фаромиллӣ кам намешавад.

Дар шароити паҳншавии тундгароӣ дар ҷомеа мо аз таъсири афзояндаи идеологияҳои радикалӣ хеле нигаронем. Вазъиятро пайваста назорат карда, ташаббускорона амал кардан зарур аст.

Мо ҷонибдори таҳкими ҳамоҳангсозии хадамоти махсус ва мақомоти салоҳиятдор бо мақсади таҳия ва эҷоди механизмҳои нави муборизаи муштарак бар зидди паҳншавии идеологияи тундгароӣ дар минтақа ҳастем.

Вазъияти Афғонистон ба амнияти мо таъсири бевосита мерасонад.

Тоҷикистон ҳамчун ҳамсояи наздиктарин ҳамеша ҷонибдори ташаккули Афғонистон ҳамчун давлати осоишта ва озод аз терроризм, ҷанг ва маводи мухаддир мебошад.

Мо ба даъватҳои расонидани кумаки башардӯстона ба мардуми азияткашидаи Афғонистон шарикем.

Мо инфрасохтори наздисарҳадӣ ва иқтидори логистикии худро ба ҳама ҷонибҳои манфиатдор барои расонидани кумаки башардӯстона ба мардуми Афғонистон пешниҳод менамоем.

Мо таъмини кишвари ҳамсояро бо неруи барқи басо зарурӣ ягон рӯз ҳам қатъ накардем.

Мо саъй дорем, ки сарҳадро бо Афғонистон мустаҳкам намуда,  инфрасохтори зарурии сарҳадӣ ташкил кунем.

Ба ин муносибат мо ҷонибдори роҳандозии ҳамкории амалии бештари кишварҳоямон бобати расонидани ёрӣ ба ҳамдигар дар  таҳкими иқтидори муҳофизати сарҳад мебошем.

Ҳамтоёни муҳтарам,

Вазъияти нави рушди ҷаҳонӣ зарурати мустаҳкам намудани ҳамкории тиҷоратию иқтисодии моро талаб мекунад.

Барои иқтисоди ҷаҳонӣ афзоиши бесуботӣ хос аст.

Ин барои пешрафти иқтисодиёти мамлакатҳои мо душвориҳои иловагӣ ба вучуд меорад.

Мо бо изҳори нигаронӣ ин ҷараёнҳоро мушоҳида мекунем.

Россия шарики калидии тиҷоратӣ-иқтисодии Тоҷикистон маҳсуб мешавад ва ҳамкорӣ бо он дар ин замина дар маҷмӯи равобити ду кишвар мақоми хоссаро ишғол мекунад.

Мо бар ин назарем, ки дар шароити кунунӣ кишварҳои Осиёи Марказӣ ва Россияро зарур аст барои ташаккули шакли муассири ҳамкории иқтисодӣ роҳу равиш пайдо кунанд.

Дар зимн мо тартиби мусоидати бештар ба савдои доираи васеи молҳоро дар бахшҳои стратегии иқтисодиётамон ҷонибдорӣ менамоем.

Муколамаи санҷишии шашҷониба, ки мо дар соҳаи тиҷорат ба вуҷуд оварда истодаем, бояд барои муҳокимаи лоиҳаҳои иқтисодии байнидавлатӣ барномаи муассир гардад.

Дар соҳаи саноат низ барои ҳамкории бисёрҷонибаи мо ояндаи дурахшон мавҷуд аст.

Дар Барномаи панҷсолаи рушди босуръати саноати Тоҷикистон барои давраи то соли 2025 2,5 баробар афзоиш додани мизони тавлидоти ин бахш пешбинӣ шудааст.

Аз ин рӯ, мо ба таъсиси корхонаҳои муштарак бо шарикон аз Осиёи Марказӣ ва Россия дар соҳаҳои мухталиф манфиатдорем.

Мо пешниҳод менамоем, ки Барномаи ҳавасмандгардонии ҳамкории саноатии кишварҳои Осиёи Марказӣ ва Россия таҳия ва қабул карда шавад.

Масъалаҳои таъмини амнияти озуқаворӣ аҳамияти муҳим доранд.

Дар шароити авҷ гирифтани тамоюлҳои манфӣ дар ин соҳа мо бояд диққати асосиро ба қабули амалҳои дар ин самт мувофиқа ва ҳамоҳангшуда равона намоем.

Бо назардошти хеле бо ҳам алоқаманд будани иқтисодиётамон, дар бобати муқаррар намудани манъ ё маҳдудияти савдои ғалла ва дигар маҳсулоти ҳаётан муҳим миёни мамлакатҳои мо бештар эҳтиёткор будан зарур аст.

Ҳамтоёни муҳтарам,

Дар интиҳо мехостам Президенти Қазоқистон Қосим-Жомарт Кемелевич Токаевро бо баргузории муваффақонаи нишастҳо дар Остона табрик намоям.

Тоҷикистон ҷонибдори ҳамкории мутақобилан судманд бо кишварҳои Осиёи Марказӣ ва Россия бо мақсади рушди устувори муштарак мебошад.

Ташаккур барои таваҷҷуҳ.

Октябрь 14, 2022 21:26

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/
Тандиси биринҷии чеҳраи Пешвои миллат ба Сарвари давлат Эмомалӣ Раҳмон тақдим гардид
Сарвари давлат Эмомалӣ Раҳмон дар шаҳри Душанбе дар ҳамоиши наврӯзӣ – «Корвони шодӣ» иштирок намуданд
Суханронии Пешвои миллат Эмомалӣ Раҳмон дар маросими баргузории карнавали наврӯзии «Корвони шодӣ» дар шаҳри Душанбе
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия суҳбати телефонӣ анҷом доданд
Президенти Ҷумҳурии Тоҷикистон Эмомалӣ Раҳмон ба Президенти Федератсияи Русия Владимир Путин барқияи изҳори тасаллӣ ирсол намуданд
Як қатор сарони давлатҳо ба унвони Президенти Ҷумҳурии Тоҷикистон Эмомалӣ Раҳмон ба муносибати ҷашни Наврӯзи байналмилалӣ барқияҳои табрикӣ ирсол намуданд
Масъалаи зиёд намудани сармоягузорӣ ба татбиқи Неругоҳи барқи обии «Роғун» баррасӣ гардид
Паёми шодбошии Пешвои миллат Эмомалӣ Раҳмон ба ифтихори Наврӯзи соли 2024
Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд