Дабири кулли СММ бар он назар аст, ки ҷомеаи ҷаҳонӣ дар буҳрон қарор дорад

ДУШАНБЕ, 23.11.2022. /АМИТ «Ховар»/. Ҷомеаи ҷаҳонӣ аз сабаби низоъҳо, афзоиши нобаробарии ҷаҳонӣ, паҳншавии маълумоти бардурӯғ ва суханпардозие, ки ба барангехтани адоват нигаронида шудааст, дар буҳрон қарор дорад. Тавре АМИТ «Ховар» бо истинод ба Хадамоти матбуоти СММ хабар медиҳад, дар ин бора рӯзи сешанбе Дабири кулли СММ Антониу Гутерриш зимни суханронӣ дар Анҷумани ҷаҳонии Иттиҳоди тамаддунҳо изҳори назар кард.

«Агар мо имрӯз ба ҷаҳон назар андозем, мебинем, ки ҷаҳон дар буҳрон аст. Қувваҳои ихтилоф ва адоват миёни сарватманд ва камбизоат, Шимоли ҷаҳонӣ ва Ҷануби ҷаҳонӣ, кишварҳои пешрафта ва иқтисодҳои дар ҳоли рушд васеъ мешаванд. Танишҳои геополитикӣ, иҷтимоӣ ва иқтисодӣ афзоиш меёбанд»,-гуфт дабири кул.

Гутерриш зикр кард, ки муноқишаҳо, аз ҷумла дар Украина ҳаёт ва некӯаҳволии кишварҳоро хароб мекунанд. «Буҳроне, ки бо арзиши зиндагӣ тавъам аст, ба осебпазиртаринҳо зарбаи сахт зад. Эътимод ба ҳамдигар ва ба раҳбарони сиёсӣ пора-пора шуд»,- афзуд ӯ.

Дабири кулли Созмони Милали Муттаҳид ба мушкилоти таъмини ҳуқуқи башар, паҳншавии маълумоти бардурӯғ, суханони бадбинӣ ва ҳамчунин хушунат алайҳи занон ишора кард.

Гутерриш ҳамчунин ба мушкилоте, ки бар асари тағйирёбии иқлим ба вуҷуд омадааст, таваҷҷуҳ зоҳир намуд.

Акс: СММ