Доир ба баланд бардоштани савияи дониши оморӣ дар Хатлон машварат доир шуд

ДУШАНБЕ, 01.11.2022. /АМИТ «Ховар/. Дар шаҳри Бохтари вилояти Хатлон чанде қабл бо иштироки мутасаддиёни раёсату шуъбаҳои маорифи вилоят ва шаҳру ноҳияҳои он оид ба пешниҳоди ҳисоботи оморӣ машварат доир шуд. Ҳамоиши мазкур дар доираи лоиҳаи «Таҳкими омори демографӣ», ки аз ҷониби Хазинаи аҳолии СММ маблағгузорӣ мешавад, бо ташаббуси Ташкилоти ҷамъиятии «Хазинаи паст намудани сатҳи камбизоатӣ» баргузор гардид.

Тавре ба АМИТ «Ховар» дар ТҶ «Хазинаи паст намудани сатҳи камбизоатӣ» иттилоъ доданд, ҳадаф аз баргузории ҳамоиши мазкур — ин баланд бардоштани савияи дониши омории мутасаддиёни раёсату шуъбаҳои маориф ва муассисаҳои таълимии вилоят ҷиҳати сари вақт ва дуруст пешниҳод намудани ҳисоби омории соҳаи маориф ва илм мебошад.

Дар он оид ба Барномаи компютерии САИ «Системаи автоматикунонии иттилоотӣ», нишондиҳандаҳои Ҳадафҳои рушди ҳазорсола ва талаботи нав ба САИ «Системаи автоматикунонии иттилоотӣ» маърӯзаҳо пешниҳод гардиданд.

Ҳамзамон доир ба ин мавзӯъҳо аз ҷониби иштирокчиён корҳои амалӣ гузаронида шуданд.

АКС: ТҶ «Хазинаи паст намудани сатҳи камбизоатӣ»