ФУТБОЛ. «Истиқлол» миёни дастаҳои Лигаи олӣ пеш аз муҳлат чемпиони Тоҷикистон гардид

ДУШАНБЕ, 08.11.2022 /АМИТ «Ховар»/. Дастаи футболи «Истиқлол»-и шаҳри Душанбе дар бозии даври 20-уми Чемпионати Тоҷикистон оид ба футбол миёни дастаҳои Лигаи олӣ бар дастаи «Хатлон»-и шаҳри Бохтар бо ҳисоби 1:0 ғалаба карда, маротибаи 11-ум чемпиони мамлакат шуд, хабар медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Бозиҳои даври 20-уми Чемпионати Тоҷикистон оид ба футбол миёни дастаҳои Лигаи олӣ 4-6 ноябр дар варзишгоҳҳои мамлакат дар сатҳи баланд баргузор шуданд. Голи ягонаро дар бозии гурӯҳи «А» миёни дастаҳои футболи «Истиқлол»-и шаҳри Душанбе ва «Хатлон»-и шаҳри Бохтар Алиҷон Кароматуллозода ба нишон расонид. Дар бозии дигари гурӯҳ дастаи футболи «Равшан»-и шаҳри Кӯлоб дар сафар дастаи КМВА-и шаҳри Душанберо бо ҳисоби 2:0 шикаст дод. Голҳоро Комрони Мирзохон ва Абдухалил Боронов ба ҳадаф расониданд.

Дар гурӯҳи «В» дастаҳои футболи «Регар-ТадАЗ»-и шаҳри Турсунзода бар «Эсхата»-и шаҳри Хуҷанд бо ҳисоби 2:1, «Файзканд»-и ноҳияи Восеъ бар «Истаравшан» бо ҳисоби 3:1 пирӯз шуданд.

Пас аз натиҷагирии 20 даври бозиҳо дастаи футболи «Истиқлол»-и шаҳри Душанбе дар ҷадвали мусобиқа бо 42 хол дар ҷои аввал аст. Дастаҳои футболи «Равшан»-и шаҳри Кӯлоб бо 10 хол камтар (32) дар ҷои дуюм, «Хатлон»-и шаҳри Бохатар бо 31 хол дар ҷои сеюм мавқеъ доранд.

Бозиҳои даври 21-уми Чемпионати Тоҷикистон оид ба футбол миёни дастаҳои Лигаи олӣ 9-11 ноябр ба нақша гирифта шудаанд.

9 ноябр дастаҳои футболи «Равшан»-и шаҳри Кӯлоб бо «Истиқлол»-и шаҳри Душанбе, «Хуҷанд»-и шаҳри Хуҷанд бо КМВА-и шаҳри Душанбе, 10 ноябр дастаҳои «Эсхата»-и шаҳри Хуҷанд бо «Истаравшан»-и шаҳри Истарвшан, 11 ноябр дастаҳои футболи «Равшан»-и ноҳияи Зафаробод бо «Регар-ТадАЗ»-и шаҳри Турсунзода вомехӯранд.

АКС: Федератсияи футболи Тоҷикистон