ФУТБОЛ. «Истиқлол» унвони Чемпиони Тоҷикистонро соҳиб шуд

Ноябрь 24, 2022 15:22

ДУШАНБЕ, 24.11.2022 /АМИТ «Ховар»/. Дастаҳои футболи «Равшан»-и ноҳияи Зафаробод ва «Истаравшан»-и шаҳри Истаравшан дар Чемпионати Тоҷикистон оид ба футбол миёни дастаҳои Лигаи олӣ дар ҷадвал ду ҷои охирро ишғол карданд ва дар мавсими оянда ба Лигаи якум мегузаранд, хабар медиҳад шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон.

Дар бозии даври 23-юми Чемпионати Тоҷикистон оид ба футбол дар гурӯҳи «В» дастаи «Истаравшан»-и шаҳри Истаравшан аз дастаи футболи «Регар-ТадАЗ»-и шаҳри Турсунзода бо ҳисоби 0:2, дастаи «Равшан»-и ноҳияи Зафаробод аз дастаи футболи «Файзканд»-и ноҳияи Восеъ бо ҳисоби 1:4 шикаст хӯрданд.

Дар гурӯҳи «А» бозиҳои даври 22-юм сурат гирифта, дастаи футболи «Истиқлол»-и шаҳри Душанбе бар дастаи «Хуҷанд»-и шаҳри Хуҷанд бо ҳисоби 2:0 ва дастаи «Хатлон»-и шаҳри Бохтар бар дастаи футболи «Равшан»-и шаҳри Кӯлоб бо ҳисоби 3:0 ғалаба карданд.

Пас аз натоиҷи бозиҳои даври 22-юми Чемпионати Тоҷикистон-2022 дастаи «Равшан»-и шаҳри Кӯлоб барои худ мақомҳои ифтихориро кафолат дод. Дастаи «Равшан»-и шаҳри Кӯлоб бо 35 хол феълан дар ҷойи дуюми ҷадвал қарор дорад ва дар ҳар сурат дигар аз зинаи сеюм поён намефарояд. Дар сурати мусовӣ ё пирӯзии дастаи «Хатлон» дар бозии даври ниҳоӣ бо дастаи «Хуҷанд»-и шаҳри Хуҷанд дастаи «Хатлон»-и шаҳри Бохтар мақоми дуюмро мегирад ва дастаи «Равшан»-и шаҳри Кӯлоб соҳиби медалҳои биринҷӣ мешавад. Дар сурати пирӯзии дастаи «Хуҷанд» бар дастаи футболи «Хатлон»-и шаҳри Бохтар дастаи «Равшан»-и шаҳри Кӯлоб барандаи медалҳои нуқраи Чемпионати Тоҷикистон-2022 ва дастаи футболи «Хуҷанд»-и шаҳри Хуҷанд барандаи медалҳои биринҷӣ мегарданд.

Ба футболбозон, мураббиён ва роҳбарияти дастаи «Истиқлол»-и шаҳри Душанбе, ки пеш аз муҳлат дар Чемпионати Тоҷикистон-2022 пирӯзӣ ба даст оварданд, пас аз бозӣ бо дастаи футболи «Хуҷанд»-и шаҳри Хуҷанд бо ҳисоби 2:0 ҷоми чемпионӣ ва медалҳои тилло тақдим карда шуданд.

Қобили зикр аст, ки дастаи футболи «Истиқлол»-и шаҳри Душанбе маротибаи ёздаҳум дар таърихи худ медалҳои тиллои Чемпионати Тоҷикистонро ба даст овард.

Ёдовар мешавад, ки қаблан дастаи футболи «Истиқлол»-и шаҳри Душанбе солҳои 2010, 2011, 2014, 2015, 2016, 2017, 2018, 2019, 2020 ва 2021 чемпиони Тоҷикистон шуда буд.

Акс: ФФТ

Ноябрь 24, 2022 15:22

Хабарҳои дигари ин бахш

ҶОМИ ОСИЁ-2026. Имрӯз дастаи мунтахаби Тоҷикистон оид ба футзал бо тими Ҷопон бозӣ мекунад
Тоҷикистонро дар Бозиҳои сеюми кишварҳои ИДМ 142 варзишгар муаррифӣ менамояд
Мусобиқаи байналмилалӣ оид ба теннис барои дарёфти «Ҷоми Президенти Ҷумҳурии Тоҷикистон» ҷамъбаст гардид
ҶОМИ ОСИЁ-2026. Имрӯз дастаи мунтахаби Тоҷикистон оид ба футзал бо Камбоҷа бозӣ мекунад
Дар рӯзи охирини Ҷоми ҷаҳон оид ба самбо варзишгарони тоҷик соҳиби 6 медал шуданд
ҶОМИ ОСИЁ-2026. Дастаи мунтахаби Тоҷикистон оид ба футзал дар оғози марҳилаи интихобӣ тими Макаоро мағлуб намуд
Варзишгарони Тоҷикистон дар Бозиҳои ИДМ-2025 иштирок менамоянд
ҶОМИ ҶАҲОН ОИД БА САМБО. Варзишгарони тоҷик дар рӯзи якуми мусобиқа се медал ба даст оварданд
ҶОМИ ОСИЁ-2026. Имрӯз дастаи мунтахаби Тоҷикистон оид ба футзал бо дастаи Макао бозӣ мекунад
Мусобиқаи 15-уми байналмилалӣ оид ба теннис дар Душанбе идома дорад
Мусобиқаи байналмилалӣ оид ба теннис барои дарёфти Ҷоми Президенти Ҷумҳурии Тоҷикистон оғоз меёбад
«Регар-ТадАЗ» бори ҳаштум барандаи Ҷоми Тоҷикистон-2025 оид ба футбол шуд