Сарвари давлат Эмомалӣ Раҳмон дар шаҳри Ваҳдат бинои нави Муассисаи таҳсилоти миёнаи умумии рақами 3-ро ба истифода супориданд

Ноябрь 10, 2022 08:55

ДУШАНБЕ, 10.11.2022. /АМИТ «Ховар»/. 10 ноябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Ваҳдат бинои нави Муассисаи таҳсилоти миёнаи умумии рақами 3-ро ба истифода супориданд.

Бинои нави таълимӣ аз 3 ошёна иборат буда, бо ҷонибдорӣ аз сиёсати маорифпарваронаи Ҳукумати Ҷумҳурии Тоҷикистон ба истиқболи ҷашни 35-солагии Истиқлолияти давлатии Ҷумҳурии Тоҷикистон аз ҷониби соҳибкори ватанӣ, собиқ хатмкардаи ин муассиса Евгений Мулоқандов сохта шудааст.

Дар муассисаи тозабунёд 720 нафар хонанда дар ду баст ба таҳсил фаро гирифта мешаванд. Даргоҳи нави маърифат дорои 13 синфхонаи барҳаво, аз ҷумла технологияи иттилоотӣ, таълими меҳнат, ҳуҷраи омӯзгорон ва дигар иншооти ёрирасон буда, бо дастгоҳу аёнияти таълимӣ маҷаҳҳаз аст.

Бо ифтитоҳи бинои нави таълимӣ шумораи синфхонаҳои Муассисаи таҳсилоти миёнаи умумии №3 дар шаҳри Ваҳдат ба 55 адад расид ва мушкили норасоии ҷойи нишасти хонандагон ҳалли худро пайдо намуд.

Иншоот дар масоҳати 1500 метри мураббаъ аз рӯи лоиҳаи Ҷамъияти дорои масъулияти маҳдуди “Архиком” бо ҷалби мутахассисони Ҷамъияти дорои масъулияти маҳдуди “Шарора” дар муҳлати муайянгардида бо сатҳу сифати баланд ва ҷавобгӯ ба меъёрҳои муосир сохта шудааст.

Дар ҷараёни корҳои сохтмонӣ 150 нафар бо ҷойи кор ва маоши хуб таъмин гардиданд.

Раванди омӯзиш дар муассисаи таълимӣ бо забонҳои тоҷикиву русӣ ба роҳ монда шуда, дар бинои нави он 26 нафар ва дар маҷмӯъ дар мактаб 80 омӯзгори ботаҷриба ба таълиму тарбияи насли наврас машғуланд.

Сарвари давлат муҳтарам Эмомалӣ Раҳмон пас аз шиносоӣ бо шароити муосири таълиму тарбияи хонандагон дар даргоҳи нави маърифат бо лоиҳаи иншооти нави ёрирасони Муассисаи таҳсилоти миёнаи умумии №3 дар шаҳри Ваҳдат шинос гардиданд.

Иттилоъ дода шуд, ки соҳибкори ватанӣ иқдом гирифтааст дар назди ин муасссаи таълимӣ барои хонандагон китобхона, ошхона, майдончаи варзишӣ ва қасри варзишӣ сохта, ба истифода диҳад.

Дар асоси лоиҳа китобхонаю ошхонаи муассисаи таълимӣ дар масоҳати 400 метри мураббаъ- ҳар кадоме бо 200 ҷойи нишаст сохта мешавад.

Президенти мамлакат муҳтарам Эмомалӣ Раҳмон аснои шиносоӣ бо лоиҳаи иншооти нави бунёдшаванда ба соҳибкори ватанӣ барои ҷонибдорӣ аз сиёсати пешгирифтаи Ҳукумати Ҷумҳурии Тоҷикистон ва саҳмгузорӣ дар рушди соҳаи илму маорифи мамлакат бо мақсади фароҳам овардани шароити замонавии таълиму тарбияи насли наврасу ҷавон изҳори сипос намуданд.

Ифтитоҳи бинои нави Муассисаи таҳсилоти миёнаи умумии №3 дар шаҳри Ваҳдат 10.11.2022

Ноябрь 10, 2022 08:55

Хабарҳои дигари ин бахш

Иттиҳоди Аврупо ба сармоягузории рушди долонҳои иқтисодию нақлиётии Тоҷикистон омодагии худро баён намуд
Президенти Ҷумҳурии Тоҷикистон Эмомалӣ Раҳмон бо муовини Раиси Девони вазирони Туркманистон Тангригули Атахаллиев мулоқот анҷом доданд
Дурнамои рушди Бонки амонатгузории Ҷумҳурии Тоҷикистон «Амонатбонк» барои 3-5 соли оянда баррасӣ гардид
Президенти Тоҷикистон: «Бояд дар мамлакат сафи соҳибкорзанон зиёд шавад»
ЛИГАИ ЧЕМПИОНҲОИ ОСИЁ. Дар даври охирин «Истиқлол» бо «Ал-Наср» ва «Персеполис» бо «Ал-Дуҳайл» бозӣ менамоянд
Комиссияи Иттиҳоди Аврупо омодаи тавсеаи ҳамкорӣ дар соҳаҳои тиҷорату иқтисод бо Тоҷикистон аст
Дар Душанбе Мактаби химикони давлатҳои Иттиҳоди Давлатҳои Мустақил мегузарад
Раиси вилояти Хатлон бо ҷараёни корҳои навсозии Мадрасаи Хоҷа Машҳад шинос шуд
Паҳлавонони тоҷик дар Чемпионати ҷаҳон оид ба кураш дар Туркманистон соҳиби 2 медали биринҷӣ шуданд
Дар Душанбе протоколи ҷаласаи дувоздаҳуми Комиссияи муштараки Тоҷикистон ва Туркманистон ба имзо расид
Довталаби 83-солаи озмуни ««Тоҷикон»-оинаи таърихи миллат» Маъқула Ҳакимова: «Мо, калонсолон бояд дар хондану дўст доштани китоб барои насли ояндасоз намуна бошем»
Пешвои миллат Эмомалӣ Раҳмон дар ҷаласаи XXIII Шурои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ иштирок намуданд