Дар Арабистони Саудӣ таҷлили мавлуди Исоро иҷозат доданд

ДУШАНБЕ, 28.12.2022 /АМИТ «Ховар»/. Шоҳигарии муҳофизакори Арабистони Саудӣ бо гузаронидани якчанд ислоҳоти муосири худ барои таҷлили иди насронӣ омода мешавад. Дар ин бора Financial Times иттилоъ медиҳад.

Қаблан дар Арабистони Саудӣ ба таври маъмулӣ яке аз муҳимтарин рӯзҳои тақвими насронӣ расман таҷлил намешуд.

Вале, тавре рӯзномаи Financial Times зикр менамояд, сокинони Ар-Риёз имсол имкон пайдо намуданд, ки аз намоишҳои мавсимӣ дар марказҳои тиҷоратӣ лаззат бурда, арчаҳои солинавӣ бихаранд. Ҳамчунин The Guardian менависад, ки қандакҳо, кулоҳҳои Бобои барфӣ, барфи сунъӣ ва ҳатто арчаҳои солинавӣ дар дӯконҳо ва қаҳвахонаҳои маҳаллии Ар-Риёз ба маърази тамошо гузошта шудаанд.

Илова бар ин, яке аз рӯзномаҳои расмии Арабистони Саудӣ бори нахуст дар таърихи худ шумораи вижаи ҷашнӣ нашр кардааст. «Саудиҳо рӯҳияи мавлуди Исоро аз пештара дида бештар эҳсос мекунанд»,-омадааст дар сархати аввали рӯзномаи расмии англисизабони Arab News.

Шаҳлои САДРИДДИН,
АМИТ «Ховар

АКС: youtube.com