Дар Токио таҳкиму тавсеаи ҳамкории кишварҳои Осиёи Марказӣ ва Ҷопон баррасӣ шуд

ДУШАНБЕ, 24.12.2022 /АМИТ «Ховар»/. 23 декабр Вазири корҳои  хориҷии Ҷумҳурии Тоҷикистон Сироҷиддин Муҳриддин дар мулоқоти муштараки вазирони корҳои хориҷии кишварҳои Осиёи Марказӣ бо Сарвазири Ҷопон Фумио Кишида ширкат намуд.

Дар ҷараёни мулоқот атрофи масъалаҳои муносибатҳои дуҷонибаю бисёрҷониба ва инчунин аҳаммияти таҳкиму тавсеаи ҳамкорӣ дар чаҳорчӯби «Муколамаи Осиёи Марказӣ + Ҷопон» табодули афкор гардид.

Тавре қаблан иттилоъ дода будем, 18 майи соли 2019 дар шаҳри Душанбе таҳти раёсати  Тоҷикистон машварати 7-уми Муколамаи  вазирони корҳои хориҷии «Осиёи Марказӣ + Ҷопон»  баргузор гардид.

Дар он вазирони коррҳои хориҷии Тоҷикистон, Қазоқистон, Қирғизистон, Узбекистон, Ҷопон ва муовини Вазири корҳои хориҷии Туркманистон, инчунин ба ҳайси меҳмони фахрӣ Вазири корҳои хориҷии Афғонистон иштирок доштанд.

Дар доираи машварат  се ҷаласа дар мавзӯъҳои  «Ҳамкории амалии   кишварҳои аъзои  Муколамаи «Осиёи Марказӣ + Ҷопон» дар бахши сайёҳӣ», «Ҳамкории кишварҳои аъзои Муколамаи «Осиёи Марказӣ + Ҷопон» дар соҳаҳои савдо, сармоя  ва рушд», инчунин «Амнияти минтақавӣ ва ҳамкории минтақавӣ» доир гардид.

Дар фарҷоми машварат роҳбарони ҳайатҳо Изҳороти муштараки машварати 7-уми вазирони корҳои хориҷии Муколамаи «Осиёи Марказӣ + Ҷопон»-ро ба тасвиб расониданд.

Хотиррасон менамоем, ки иштирокдорони ин машваратро Пешвои  миллат, Президенти Ҷумҳурии Тоҷикистон муҳтарам  Эмомалӣ Раҳмон ба ҳузур пазируфтанд.

Ёдовар мешавем, ки соли 2004 Ҷопон   иқдомеро доир ба шакли  нави ҳамкорӣ  бо кишварҳои Осиёи Марказӣ – Муколамаи «Осиёи Марказӣ+Ҷопон»   ба роҳ монд. Ҳадаф аз он густариш ва тақвияти робитаҳои қавии  кишварҳои минтақа бо Ҷопон ва таҳкими ҳамкории минтақавӣ мебошад.

Дар зарфи ин солҳо Муколама дар таҳкими ҳамкории гуногунсоҳаи кишварҳои Осиёи Марказӣ бо Ҷопон  нақши муассир гузошт.

Акс: ВКХ ҶТ