ПАЁМИ ПЕШВОИ МИЛЛАТ – РОҲНАМОИ ТОҶИКОН. Дар Донишгоҳи давлатии Кӯлоб конференсия баргузор гардид

ДУШАНБЕ, 28.12.2022 /АМИТ «Ховар»/. Дар партави Паёми Президенти Ҷумҳурии Тоҷикистон ба Маҷлиси Олӣ дар Донишгоҳи давлатии Кӯлоб ба номи Абӯабдуллоҳи Рӯдакӣ таҳти унвони «Паёми Пешвои миллат – роҳнамои халқи тоҷик» конференсияи илмӣ-назариявӣ баргузор шуд, хабар доданд ба АМИТ «Ховар» дар Донишгоҳи мазкур.

Ректори донишгоҳ Дилшод Раҳмон гуфт, ки Паём яке аз беҳтарин дастурҳои раҳнамунсоз дар ободкорию созандагиҳои Тоҷикистони азиз мебошад. Дар ҳақиқат, Паёме, ки пешниҳод гардид, дар он ягон соҳа аз мадди назари Пешвои миллат дур намонда, чун анъана дар ин раванд таҳлилҳои ҳаққонӣ мақоми меҳварӣ доштанд. Раванди рушди иқтисодию иҷтимоии мамлакат дар 5 соли охир аз ҷониби Сарвари давлат муҳтарам Эмомалӣ Раҳмон мавриди таҳлил қарор гирифт.

Зимни конференсия дар мавзӯъҳои «Паёми Пешвои миллат – ифодакунандаи мақсаду мароми мардум», «Ҷанбаҳои сиёсати хориҷии Ҷумҳурии Тоҷикистон дар Паёми Пешвои миллат муҳтарам Эмомалӣ Раҳмон ба Маҷлиси Олӣ» ва «Инъикоси масоили иқтисодӣ дар Паёми Пешвои миллат» маърӯзаҳо шунида шуданд.

АКС: Донишгоҳи давлатии Кӯлоб ба номи Абӯабдуллоҳи Рӯдакӣ