Паёми Президенти Тоҷикистон барномаи мукаммали илмӣ, таҳлилӣ ва бунёдии ояндасоз мебошад

ДУШАНБЕ, 27.12.2022 /АМИТ «Ховар»/. Ҷиҳати таҳлили нуктаҳои асосии Паёми навбатии Сарвари давлат 26 декабр дар Донишгоҳи давлатии омӯзгории Тоҷикистон ба номи Садриддин Айнӣ таҳти унвони «Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон- барномаи мукаммали илмӣ, таҳлилӣ ва бунёдии ояндасоз» ҳамоиши илмӣ баргузор шуд. Дар ин бора ба АМИТ «Ховар» дар Донишгоҳи омӯзгорӣ хабар доданд.

Дар ҳамоиш роҳбарон ва устодони донишгоҳ дар мавзӯъҳои «Мавқеъ ва нақши Паёми Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди қонунгузории Ҷумҳурии Тоҷикистон ва таҳкими сиёсати ҳуқуқии мамлакат», «Рушди соҳаи маориф – масъалаи калидии Паёми Пешвои миллат», «Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон- ташаббускори пешгирии мушкилоти тағйирёбии глобалии иқлим ва истифодаи оқилонаи захираҳои обӣ», «Таҳлили ҷанбаҳои иқтисодии нуктаҳои Паёми навбатии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон», «Масъалаи робитаҳои фаъол ва рушду таҳкими маҷмӯи муносибатҳои байналмилалӣ дар Паёми навбатии Пешвои миллат муҳтарам Эмомалӣ Раҳмон» маъруза намуданд.

Зикр шуд, ки Паёми Сарвари давлат ифодакунандаи возеҳи рушди самтҳои иҷтимоӣ, иқтисодӣ, илмию фарҳангӣ ва сиёсати дохилию хориҷии кишвар мебошад, зеро тамоми барномаҳои кории ҳама ниҳодҳои давлат тавассути ҳамин санад баррасӣ мешаванд. Аз ин рӯ баррасӣ намудани нуктаҳои рисолати Президенти мамлакат дар ниҳодҳои давлатӣ ва ҷамъиятӣ бояд ба ҳайси амри маъмулӣ амалӣ гардад.

АКС: Донишгоҳи давлатии омӯзгории Тоҷикистон ба номи С.Айнӣ