САТҲИ КИНОИ ТОҶИКРО БОЯД БАЛАНД БАРДОШТ. Барномаи рушди кинои Ҷумҳурии Тоҷикистон барои солҳои 2023-2027 қабул гардид

Декабрь 9, 2022 14:54

ДУШАНБЕ, 09.12.2022 /АМИТ «Ховар»/. 29 ноябр зимни баргузории маҷлиси Ҳукумати Ҷумҳурии Тоҷикистон таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон «Барномаи рушди кинои Ҷумҳурии Тоҷикистон барои солҳои 2023-2027» баррасӣ ва қабул гардид.

Сарвари давлат дар ҷараёни баррасии лоиҳаи ин барнома таъкид намуданд: кино соҳаи хеле муҳим аст, сатҳи онро мебояд хеле баланд бардошт.

Вобаста ба ҳадаф ва нақшаи амали барномаи мазкур дар Муассисаи давлатии «Тоҷикфилм» ба АМИТ «Ховар» маълумот доданд.

Муассисаи давлатии «Тоҷикфилм» лоиҳаи «Барномаи рушди кинои Ҷумҳурии Тоҷикистонро барои солҳои 2023-2027» бо назардошти вазъи воқеии соҳа, раванди ҷаҳонишавӣ ва амалисозии муқаррароти Қонуни Ҷумҳурии Тоҷикистон «Дар бораи кино», мутобиқи Стратегияи миллии рушди Ҷумҳурии Тоҷикистон барои давраи то соли 2030, Протоколи маҷлиси Шӯрои ҳукуматӣ оид ба рушди кинематографияи миллӣ ва ҳадафу вазифаҳои оинномавӣ ҷиҳати татбиқи сиёсати давлатӣ дар соҳаи кино ва тамоюли инъикоси фарҳангу худшиносии миллӣ таҳия намудааст. Ҳадафи кинои миллӣ ба ҳайси маъмултарин санъат, тарғиби идеологияи давлат, дастовардҳои замони соҳибистиқлолӣ, таъриху фарҳанг, анъана ва расму оини миллати тоҷик дар давраи ҷвҳонишавӣ мебошад.

Маблағгузории чорабиниҳои барномаи мазкур аз буҷети давлатӣ, маблағҳои Муассисаи давлатии «Тоҷикфилм», инчунин шарикии давлат ва бахши хусусӣ, ҳамзамон дигар манбаъҳое, ки қонунгузории Ҷумҳурии Тоҷикистон манъ накардааст, амалӣ карда мешавад.

Барнома дар асоси таҳлилҳои асоснок бо таваҷҷуҳ ба дурнамои рушди кинои ватанӣ таҳия гардида, дар он роҳҳо ва воситаҳои рушди кинои тоҷик муайян гардидаанд.

Ҳадаф ва вазифаҳои Муассисаи давлатии «Тоҷикфилм», пеш аз ҳама, истеҳсол, паҳнкунӣ, намоиши оммавии кино, таъмини рушди кинематография ва санъати аудиовизуалии миллӣ, таҳкими заминаи меъёрии ҳуқуқии соҳа, ташкили назорати фаъолияти кинотолорҳо ва нуқтаҳои нусхабардорӣ, ба низом даровардани бозори маводи аудиовизуалӣ мебошад, ки бе заминаи устувори моддию техникӣ ва дастгирии давлатӣ амалӣ шудани онҳо ғайриимкон аст.

«Барномаи рушди кинои Ҷумҳурии Тоҷикистон барои солҳои 2023-2027» масоили муҳими соҳа, аз қабили тайёр намудани мутахассисони ҷавон дар хориҷи кишвар, таъмини соҳаи кино бо техникаву технологияи ҳозиразамони филмофарӣ ва кинонамоишдиҳӣ, истеҳсоли филмҳои баландмазмуни миллӣ, ҷалби мутахассисони баландихтисос, барқарорсозии хазинаи миллии кинои тоҷик, муҷаҳҳаз намудани кинотеатрҳо бо технологияи нави муосир, таҳкими заминаи моддию иқтисодӣ ва ҷалби тамошобинро ба кино фаро гирифта, барои ба роҳ мондани ҳамкорӣ бо дигар кишварҳо ҷиҳати истеҳсоли филмҳои муштарак, пешниҳоди дастовардҳои соҳаи кинои тоҷик дар ҷашнвораҳои байналмиллалию минтақавӣ ва муаррифии кинои тоҷик дар арсаи ҷаҳонӣ мусоидат менамояд.

Ҳангоми таҳияи лоиҳа ба ғайр аз таҷрибаи миллӣ инчунин таҷрибаи давлатҳои пешрафта дар соҳаи филмофарӣ бо дарназардошти манфиатҳои миллӣ ба инобат гирифта шудааст.

Муддати амали барнома панҷ сол ва нақшаи амали он ду марҳила (солҳои 2023-2025 ва солҳои 2026-2027)-ро дар бар мегирад. Он дар солҳои минбаъда тамоми ҷабҳаҳои фаъолияти соҳаро ба танзим дароварда, пояҳои рушди кинои миллиро таҳким бахшида, тавсеаи ҳамкорӣ ва ба арсаи ҷаҳонӣ роҳ ёфтани кинои тоҷикро амалӣ менамояд.

Фирӯза ДАВЛАТЗОДА,
АМИТ «Ховар»

АКС аз бойгонии АМИТ «Ховар»

Декабрь 9, 2022 14:54

Хабарҳои дигари ин бахш

Бахшида ба 100-солагии адабиётшиноси маъруфи тоҷик Соҳиб Табаров ҳамоишу маҳфилҳои илмӣ-адабӣ доир мешаванд
Донишкадаи умумирусиягии кинематографияи ба номи Сергей Герасимови шаҳри Москва қабули довталабонро эълон намуд
«Нурворизм» ва «Танворизм» -«Ду равияи як рассом». Дар Осорхонаи миллӣ намоиши асарҳои рассом Зокир Собиров ифтитоҳ гардид
Коллеҷи хореографӣ ба номи Малика Собирова дар соли нави хониш ба истифода дода мешавад
«ТОҶИКОНА МЕПӮШЕМ». Ҳадафи ин иқдом тарғиби либоси миллӣ ва ҷалби тарроҳон ба муосиргардонии он мебошад
«САҲМИ ИБНИ СИНО ДАР ТАШАККУЛИ ТИББИ ҚАДИМ ВА МУОСИР: ОСОРИ ИЛМӢ, ТАҶРИБА ВА НАЗАРИЯ». Таҳти ин унвон дар Русия озмуни мақолаи беҳтарин эълон гардид
Филми «Дар талоши ҳақиқат» аввалин маротиба дар синамоҷашнвораи «Дебют»-и Амрико иштирок мекунад
Агентии миллии иттилоотии Тоҷикистон «Ховар» ҳамкориро бо рӯзномаи «Жэнмин Жибао»-и Чин тақвият мебахшад
Байни Агентии миллии иттилоотии Тоҷикистон «Ховар» ва Медиакорпоратсияи «CMG»-и Чин Ёддошти тафоҳуми ҳамкорӣ ба имзо расид
«ҲУНАР ОМӮЗ…». Дар ин озмун беҳтарин даврии чакан ба намоиш гузошта шуд
Меҳмонон аз Ҷумҳурии Мардумии Чин Осорхонаи миллии Тоҷикистонро тамошо карданд
Дар Муассисаи давлатии «Боғи Ирам»-и шаҳри Душанбе даврии ниҳоии Озмуни ҷумҳуриявии «Ҳунар омӯз…» оғоз шуд