Ба оилаҳои аз офати табиӣ зарардидаи Вилояти Мухтори Кӯҳистони Бадахшон ангишт тақсим карда шуд

ДУШАНБЕ, 27.02.2023 /АМИТ «Ховар»/.  Дар асоси дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба оилаҳои аз офати табиӣ  зарардидаи шаҳру ноҳияҳои Вилояти Мухтори Кӯҳистони Бадахшон кумаки навбатӣ расонида шуд. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.  

24 феврал дар шаҳри Хоруғ комиссияи махсус таъсис дода шуда, ба ҳар оилаи аз офати табиӣ зарардида  1500 кг ва дар маҷмуъ ба ҳамаи онҳо  48 тонна ангишт  кумак карда шуд.

Ёдовар мешавем, ки дар асоси дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ба оилаҳои аз офати табиӣ зарардидаи шаҳру ноҳияҳои вилоят кумак расонида шуд.    Дар маҷмуъ, дар натиҷаи ин офати табиӣ аҳолӣ дар  шаҳри Хоруғ, ноҳияҳои Дарвоз, Ванҷ, Рӯшон, Шуғнон ва Роштқалъа зарар дидаанд.

Кумак дар ҳаҷми  40 тонна  буда, асосан  либоси зимистона, пойафзол, хӯрокворӣ ва кати хобро дар бар мегирад.

Тибқи нақша  Ҳукумати Ҷумҳурии Тоҷикистон рӯзҳои наздик ба хонаводаҳои зарардида дар шаҳру ноҳияҳои ВМКБ  боз кумак мерасонад.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон