ФУТБОЛ. Дастаи мунтахаби ҷавонони Тоҷикистон бозиро бо дастаи ЛКС-и Лаҳистон мусовӣ кард

ДУШАНБЕ, 01.02.2023 /АМИТ «Ховар»/. Дастаи мунтахаби ҷавонони Тоҷикистон (U-20) оид ба футбол таҳти роҳбарии мутахассиси беларус Олег Кубарев дар ҷамъомади таълимиву тамринии Анталия бозии сеюми санҷишӣ баргузор кард. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад. 

31 январ дастаи ҷавонони мо бо пешсафи дивизиони якуми Лаҳистон- дастаи ЛКС-и шаҳри Лодзи рақобати санҷишӣ гузаронд. Бозӣ бо ҳисоби 1:1 анҷом ёфт. Ҳисобро дар дақиқаи 26-ум Амадонӣ Камолов кушод. Дар ибтидои нимаи дуюм Петр Янчукович таносубро барқарор сохт.

Барои дастаи Олег Кубарев ин сеюмин бозии санҷишӣ дар ҷамъомади таълимиву тамринии Туркия буд. Қаблан дастаи мунтахаби ҷавонони Тоҷикистон (U-20) бо ҳамсолонаш аз Ироқ мусовӣ (0:0) карда, аз бошгоҳи Суперлигаи Узбекистон «Бухоро» (1:3) шикаст хӯрд.

Бозии санҷишӣ

 ТОҶИКИСТОН (U-20) – ЛКС (Полша) – 1:1

 Голҳо: Амадонӣ Камолов, 26 (1:0). Петр Янчукович, 47 (1:1).

Дастаи ҷавонони Тоҷикистон (ҳайати асосӣ): Суҳробхӯҷа Юсупов, Содиқҷон Қурбонов, Раҳматшо Раҳматзода, Фахриддин Ахтамов, Шаҳриёри Иноятулло, Азизбек Ҳаитов, Салоҳиддин Иргашев, Амадонӣ Камолов, Хусрав Тоиров, Алиҷони Айнӣ, Сунатулло Азизов.

31 январ. Сиде, Туркия. Маҷмааи варзишии «Арслан Зеки Демирчӣ».

Акс: ФФТ