Гурӯҳи корӣ аз нуқтаҳои нуқсондоштаи роҳи мошингарди Душанбе-Бохтар дидан намуд

ДУШАНБЕ, 21.02.2023 /АМИТ «Ховар»/. Гурӯҳи кории Вазорати нақлиёти Ҷумҳурии Тоҷикистон, иборат аз ҳайати муҳандисони Корхонаи воҳиди давлатии «Пажуҳишгоҳи лоиҳакашии иншооти нақлиётӣ», Маркази татбиқи лоиҳаҳои таҷдиди роҳҳо ва «Роҳи Абрешим» аз километрҳои 12 ва 13-уми роҳи мошингарди Душанбе-Бохтар, ки дар баъзе ҷойҳои он нуқсонҳо пайдо шудаанд, дидан намуд, иттилоъ доданд ба АМИТ «Ховар» дар вазорати мазкур.

Роҳбари ҳайати гурӯҳ ба роҳбарият ва муҳандисони Корхонаи воҳиди давлатии «ПЛИН» ва Маркази татбиқи лоиҳаҳои таҷдиди роҳҳо супориш дод, ки ҳарчи зудтар сабабҳои пайдоиши нуқсонҳо, яъне кафидагиҳои рӯпӯши роҳоро муайян намуда, ҷиҳати бартараф кардани он тадбирҳои зарурӣ андешанд.

Ҳангоми санҷиш иттилоъ дода шуд, ки қад — қади роҳи мазкур нуқтаи шустушӯи мошинҳо ташкил шуда, ҳамчунин каналҳо то ҷои обпартои роҳ омада, онро пур мекунанд, ки ин боиси нам гирифтан ва вайрон гардидани роҳҳо мешавад.

Масъулини соҳа вазифадор карда шуданд, ки дар якҷоягӣ бо паймонкорон ва мақомоти маҳаллӣ дар тамоми роҳи навсохта бори дигар санҷиш гузаронда, сабаби пайдоиши нуқсонҳоро аниқ муайян ва камбудиҳоро пурра бартараф созанд.

АКС: Вазорати нақлиёти Ҷумҳурии Тоҷикистон