«ХУШБАХТӢ ДАР ҶОИ КОР». Бонки Эсхата дар нахустин озмуни байналмилалии ширкатҳо қадрдонӣ карда шуд

ДУШАНБЕ, 15.02.2023 /АМИТ «Ховар»/. Дар натиҷаи пурсиши қаноатмандии кормандони Бонки Эсхата муайян гардид, ки аксарият кормандони бонк дар ҷои кор худро хушбахт меҳисобанд. Ин маънои онро дорад, ки кормандон аз мавқеъ, маош ва муносибатҳои дохилии корпоративии худ қаноатманданд. Дар ин хусус ба АМИТ «Ховар» дар Бонки Эсхата хабар доданд.

Назарсанҷии мазкур дар чаҳорчӯби нахустин Озмуни байналмилалии ширкатҳои зинда таҳти унвони “Бахт дар ҷои корӣ” аз ҷониби Маркази миллии ассессмент дар шаҳри Тошканд баргузор карда шуд, ки дар он беш аз 100 ширкати хориҷӣ, аз ҷумла Бонки Эсхата иштирок доштанд.

Бонки Эсхата дар озмуни “Бахт дар ҷои корӣ” фаъолнокӣ нишон дода, ба даври финалии озмун баромад. Бонк ҳамчун яке аз ширкатҳое эътироф шудааст, ки дар сатҳи байналмилалӣ баҳои баланди  «Индекси бахт»-ро соҳиб гашта, аз ҷониби ҷомеаи касбӣ эътироф шудааст.

«Индекси бахти ширкат дар асоси баҳодиҳии кормандон аз рӯи 12 меъёре, ки коршиносони Маркази миллии ассессмент таҳия кардаанд, ҳисоб карда мешавад. Дар асоси таҷрибаи чандсолаи ҳамкорӣ бо корпоратсияҳои бузург, бо назардошти принсипҳои “Идоракунии экологӣ, иҷтимоӣ ва корпоративӣ” ва тамаркуз ба афзалияти фарогирӣ ва тавозуни гендерӣ мо саволномаеро таҳия кардем, ки барои мо имкон медиҳад таҳлили ҳамаҷониба гузаронем. Татбиқи чунин ташаббус махсусан муҳим буда, имконият медиҳад, ки кӯшишҳо дар ҳар ташкилот ба масъалаҳои воқеан ҳам мубрам равона карда шаванд», — гуфт раиси ҳакамони Озмуни байналмилалии «Бахт дар ҷои корӣ» Тимур Ёдгоров.

Маросими ҷоизасупорӣ дар меҳмонхонаи «Хилтон Сити»-и шаҳри Тошканд дар доираи Форуми байналмилалии менеҷмент баргузор гардид. Иштирокчиёни он намояндагони тиҷоратии гуногун аз Тоҷикистон, Қазоқистон, Узбекистон ва Русия буданд.

Барномаи конфронс масъалаҳои идоракунии кадрҳо, рушди фарҳанги корпоративӣ, инчунин мавзӯъҳои марбут ба робитаи қаноатмандии кормандон ва натиҷаҳои кори онҳо дар “Ширкатҳои хушбахт” буд.

Дар нишасти мазкур Бонки Эсхатаро сардори Департаменти кор бо кормандон Малика Алимбоева ва менеҷер оид ба рушди кадрҳо Азиза Ғафурова намояндагӣ карданд.

Малика ба ҳозирин таърихи бонк, марҳилаҳои рушди он, омор, таҷрибаи ташаккули фарҳанги корпоративии Бонки Эсхатаро муаррифӣ намуд.

“Ташаккул додани муҳите, ки одамон дар он рушд мекунанд, муваффақ мегарданд ва худро бароҳат ҳис мекунанд, яке аз вазифаҳои аввалиндараҷаи роҳбарият ва кадрҳо мебошад. Пӯшида нест, ки коргарони хушбахт гарави иқлими мусоид дар коллектив, ободӣ ва музаффарияти калон ҳастанд.

Мо мехоҳем, ки кормандони бонк дар фаъолият худро хушбахт ҳис кунанд. Онҳо имкони худшиносӣ ва болоравии мансаб, қимат ва аҳамияти кори худро ҳис кунанд, аз шароите, ки бонк барои онҳо фароҳам овардааст, қаноатманд гашта, бо ҳавасмандгардонии моддию ғайримоддӣ таъмин бошанд”, — иброз дошт сардори Департаменти кор бо кормандони Бонки Эсхата Малика Алимбоева.

АКС: Бонки Эсхата