Иттиҳоди Аврупо аввалин бор аз Офтоб ва бод нисбат ба газ бештар неруи барқ гирифт

ДУШАНБЕ, 01.02.2023 /АМИТ «Ховар»/. Соли 2022 тибқи ҳисобҳои маркази таҳлилии Ember, Иттиҳоди Аврупо бори аввал аз манбаъҳои барқароршаванда назар ба сӯзондани газ бештар неруи барқ гирифт. Олмон дар Иттиҳоди Аврупо аз ҳама бештар неруи бодӣ ва офтобиро истихроҷ кардааст. Тавре АМИТ «Ховар» иттилоъ додааст, дар ин хусус АМИ «Казинформ» бо истинод ба Deutsche Welle хабар додааст.

Чунин маълумот дар ҳисоботе оварда шудааст, ки рӯзи сешанбеи 31 январ аз ҷониби маркази таҳлилии Ember оид ба сиёсати иқлими Иттиҳоди Аврупо  ба нашр расидааст.

Мувофиқи ҳисобҳо, соли гузашта дар Иттиҳоди Аврупо  тақрибан 22% неруи барқи тавлидшуда ба неруи офтобӣ ва бодӣ рост омадааст, ки нисбат ба пештара зиёд мебошад.  Дар айни замон сӯхтани газ тақрибан 20%-ро ташкил дод, ки  нисбат ба соли 2021 як фоиз камтар аст.

Аз ҳама бештар неруи барқи «сабз»-ро Ҷумҳурии Федеративии Олмон истеҳсол кардааст.

Махсусан, неруи барқи офтобӣ 14 фоизи истеҳсоли умумии неруи барқро дар Нидерландия ва 13 фоизро дар Юнону Маҷористон таъмин мекунад. Дар Олмон ин рақам танҳо қариб 10 фоизро ташкил медиҳад.

Дар мавриди неруи бодӣ бояд гуфт, ки беш аз 50 дарсади истеҳсоли он ба Дания, тақрибан 40 дарсад ба Литва ва тақрибан 35 дарсад ба Ирландия рост меояд. Дар Олмон ҳиссаи неруи барқи бодӣ тақрибан 20 фоизро ташкил медиҳад.

Азиза ДАДАБОЕВА,
АМИТ «Ховар»

АКС: dw.com