Мақомоти Зеландияи Нав ҳолати фавқулодаро дар саросари мамлакат тамдид карданд

ДУШАНБЕ, 15.02.2023 /АМИТ «Ховар»/. Мақомоти Зеландияи Нав барои рафъи пайомадҳои тӯфони тропикии Габриэл ҳолати фавқулодаро дар саросари мамлакат тамдид карданд. Тавре АМИТ «Ховар» бо истинод ба ТАСС хабар медиҳад, дар ин хусус рӯзи сешанбе вазири идораи ҳолатҳои фавқулода Киран Мак Эналти изҳор даштааст.

«Ҳукумати Зеландияи Нав бо мақсади ташкили рафъи оқибатҳои тӯфони Габриэл (13 феврал дар қаламрави мамлакат рух дода буд — ТАСС) дар мамлакат вазъияти фавқулода эълон намуд. Дар таърихи Зеландияи Нав бори сеюм аст, ки чунин вазъият дар саросари кишвар ба амал омадааст»,- таъкид намуд вазир дар изҳороте, ки дар сомонаи ҳукумат нашр гардидааст.

Ба гуфтаи сардори идора, ин тадбир ба мақомот имкон медиҳад, ки минтақаҳои аз офати табиӣ бештар зарардида бо захираҳои иловагӣ таъмин гарданд ва номгӯи тадбирҳои таъхирнопазири рафъи оқибатҳои онро муайян кунанд.

Қаблан дар аксари ҷазираҳои шимолии Зеландияи Нав вазъияти фавқулода эълон шуда буд. Бар асари тӯфони Габриеэл тақрибан 18,5 ҳазор хона дар бузургтарин шаҳри Окленди мамлакат ва атрофи он бе барқ ва алоқа монданд, нақлиёти ҷамъиятӣ, қатораҳои шаҳрӣ ва фурудгоҳ аз ҳаракат монданд. Дар минтақа бисёр мактабҳо, боғчаҳои бачагон, китобхонаҳо ва муассисаҳои варзишӣ фаъолияти худро қатъ кардаанд.

Мансур СУРУШ,
Ҷаҳонгир ГУЛМУРОДӢ,
АМИТ «Ховар»

АКС аз манбаъҳои боз